Շուրջ 2 ամիս է` Մուշում քաղաքային իշխանությունների կարգադրությամբ քանդվում են հայկական տները, որոնցում այսօր ապրում են քրդեր: Նրանց տեղափոխել են այլ բնակարաններ` հայկականության վերջին հետքերը Մուշից ջնջելու նպատակով:
Մի խումբ ուխտավորներ օրերս այցելել են Մուշ ու ականատես եղել այդ վայրագություններին:
Հայաստանից եւ Սփյուռքից մի խումբ երիտասարդներն ամեն տարի են այցելում Արեւմտյան Հայաստան` ՀՅԴ երիտասարդական գրասենյակի եւ Արեւմտահայոց հարցերի ուսումնասիրության կենտրոնի նախաձեռնությամբ: Վան, Դերսիմ, Էրզրում, Կարս, Մուշ… սա ծրագրով նախատեսված երթուղի է, որն անցնում են բազմաթիվ հայ ու օտարազգի այցելուներ:
Բայց հատկապես վերջին ամիսներին Մուշը շատերի ուշադրության կենտրոնում է:
“Ինչպես 15 թվին ասում էին` բոլոր հայերին կոտորեք, եւ նրանց ունեցվածքը ձեզ կանցնի, այսօր էլ ասել են` հայերի տները քանդեք եւ նրանց հիմքերից ոսկին կպեղեք, կհանեք: Եվ զանգվածաբար սկսել են վայրագությունը”,- ասաց Արեւմտահայոց հարցերի ուսումնասիրության կենտրոնի տնօրեն Հայկազուն Ալվրցյանը։
Մուշ այցելության ժամանակ խմբին ուղեկցել է ծննդով մշեցի եւ այստեղ բնակվող Արմեն Գալուստը: Նա գիտի ամեն մի տան ու շինության պատմությունը:
Վերջին 2 ամսում քանդվել է 44 հայկական տուն, մնացած 28-ը քանդման վտանգի տակ են: Քրդերին հանել են տներից, նոր բնակարաններով ապահովել, որպեսզի այդ տարածքում հյուրանոց ու նոր շենքեր կառուցեն:
Բարձրացած աղմուկին արձագանքել են թուրքական ու միջազգային լրատվամիջոցները` ստիպելով կասեցնել շինարարությունը: Բայց վտանգը դեռ առկա է. կասեցնել՝ չի նշանակում հրաժարվել տները քանդելու գաղափարից:
Երեւույթը քննադատեցին թուրք մտավորականներ, իրավապաշտպան Ռագըփ Զարաքոլուն առաջարկեց այդ տարածքում մշակութային կենտրոն ստեղծել` պահպանելով հայերից մնացած վերջին բեկորները: Արեւմտահայոց հարցերի ուսումնասիրության կենտրոնի տնօրեն Հայկազուն Ալվրցյանը ցավով արձանագրում է, որ Հայաստանում լռում են այս մասին:
«Թուրքիայի թուրք մտավորականները շատ ավելի բարձրացրեցին իրենց ձայնը, քան` հայ մտավորականները: Ես չեմ ասում, թե հայ մտավորականությունը կարող էր գնալ, կասեցնել, բայց պետք էր լուրջ աղմուկ բարձրացնել, մասնակցել ստորագրահավաքին, բարձրացնել այս խնդիրը տարբեր ատյաններում` հայկական, թուրքական, միջազգային, լրատվական: Սա ուղղակի Ցեղասպանության շարունակությունն է»,- ասաց նա:
Մուշի հայկական տների կործանումը կանխելու նպատակով ստորագրահավաք է սկսվել: Դրան կարելի է մասնակցել` այցելելով akunq.net կայք: Ապա օգոստոսի 3-ին տեղադրված` “Մուշի հայկական տների քանդումը դադարեցված է…” վերնագրով հրապարակման վերջում պետք է սեղմել ստորագրահավաքի էլեկտրոնային հասցեի ակտիվ հղումը:
http://www.yerkirmedia.am/?act=news&lan=hy&id=15587
Leave a Reply