Թուրքիայում կողմ են Սելիմի անունը տալ բոսֆորյան երրորդ կամրջին. ԱԶԿ

Թուրքիայի իշխող` Արդարություն և զարգացում կուսակցությունը հարցում է անցկացրել՝ որոշելու, թե ինչպես է բնակչությունը վերաբերվում Բոսֆորի նեղուցի վրա երրորդ կամրջի անվանմանը։

Թուրքական կառավարությունը որոշել էր երրորդ կամուրջն անվանակոչել օսմանյան սուլթան Սելիմ Առաջինի անունով, ով հայտնի է ալևի դավանանքի հետևորդների զանգվածային կոտորածներով։

Նման որոշումը մեծ աղմուկ էր բարձրացրել Թուրքիայում, որտեղ մի քանի միլիոն ալևի է ապրում։ Երկրի վարչապետ Թայիփ Էրդողանի կուսակցությունն էլ որոշել է հարցում անցկացնել՝ պարզելու ժողովրդի տրամադրվածությունը։

Ըստ իշխող կուսակցության՝ հարցվածների 61 տոկոսը կողմ է, որպեսզի կամուրջը կրի Սելիմ Ահեղի անունը, իսկ դեմ է միայն 24 տոկոսը։

Նշենք, որ ներկայում Ստամբուլի եվրոպական և ասիական հատվածներն իրար կապող 2 կամուրջ գոյություն ունի, իսկ երրորդի շինարարությունն արդեն սկսվել է։

AllTurkey.am