Anadolu գործակալությունը` այսուհետ նաև քրդերեն

Թուրքական Anadolu գործակալությունը 2013թ. սեպտեմբերի 1-ից կունենա նաև քրդերեն տարբերակ: Կայքը ներկայացված կլինի քրդերենի կուրմանջի և սորանի բարբառներով` հասկանալի լինելու համար և´ Թուրքիայի, և´ Իրաքի քրդերի համար: Anadolu-ն նման որոշում է կայացրել Հյուսիսային Իրաքի Քրդական Ինքնավարության ղեկավարության հետ հանդիպումներից հետո: Այժմ կատարվում են  նախապատրաստական աշխատանքներ:

Այդպիսով, քրդերենը կլինի Anadolu գործակալության 6-րդ լեզուն` թուրքերենից, անգլերենից, արաբերենից, ռուսերենից և սերբերենից (բոսնիացիների համար) հետո:

Նշվում է, որ Anadolu-ն նպատակ ունի իր հիմնադրման 100-ամյակին` 2020թ., ներկայացված լինել 11 լեզվով և դառնալ համաշխարհային 5 մեծ լրատվամիջոցներին մեկը:

Գործակալությունը ստեղծվել է 1920թ. ապրիլի 6-ին` Մուստաֆա Քեմալի նախաձեռնությամբ: Թուրքիայի Հանրապետության ապագա հիմնադիրը ցանկանում էր իր նախաձեռնած միլլի շարժման մասին տեղեկություններ տարածել բնակչության շրջանում: Այժմ Anadolu-ն համարվում է կիսապաշտոնական լրատվամիջոց:

Anadolu-ի քրդերենի բաժնի ստեղծման մասին լուրն ուշագրավ է սկսված թուրք-քրդական հաշտեցման ֆոնին: 

http://civilnet.am