Սասունի Մարութա սարի Բարձր Աստվածածին եկեղեցին վերանորոգվում է

Ներկայում Թուրքիայի տարածքում գտնվող Սասունի Մարութա (Մարաթուկ) սարի գագաթին գտնվող Մարութա Բարձր Աստվածածին եկեղեցու վերանորոգման համար առաջին քայլն արդեն կատարվել է։ Մասնագետները եկեղեցում չափագրումներ են կատարել։

Թուրքական Anadolu գործակալության փոխանցմամբ՝ Սասունի հայերի միության նախագահ Ազիզ Դաղջըն նշել է, թե Բաթման նահանգի Սասուն շրջանում գտնվող Մարութա սարի Բարձր Աստվածածին եկեղեցու վերանորոգման առաջին էտապն արդեն սկսվել է, եւ մասնագետների խումբն արդեն եկեղեցում չափագրումներ է կատարել։

«Եկեղեցու վերանորոգման նախագիծը գծվել է ճարտարապետների կողմից։ Վերանորոգման աշխատանքներն արագացնելու համար նախարարություն հետ կապի մեջ կլինեմ։ Եկեղեցու վերանորոգումից հետո նախատեսում ենք մեծ թվով զբոսաշրջիկներ բերել Սասունի շրջան»,-նշել է Ազիզ Դաղջըն։

Նշենք, որ Մարութա սարը գտնվում է Արեւմտյան Հայաստանի Սասուն գավառում եւ եղել է սասունցիների սիրած եւ պաշտելի սարը, որը կոչվել է նաեւ Մարաթուկ։

Սասունի հայերի միությունը ամեն տարի հուլիսի 28-ին կազմակերպում է վերելք-ուխտագնացություն Մարութա Բարձր Աստվածածին եկեղեցի։

http://news.am/arm/news/165753.html