Հայաստանի ազգային փոքրամասնությունները քաղաքական խնդիրներ չունեն, հիմնական խնդիրները կրթամշակութային բնույթի են, եւ երկրի ղեկավարության ուշադրության կենտրոնում են։ Այս մասինօգոստոսի 5-ին մամուլի ասուլիսի ժամանակ հայտարարել է Հայաստանում Ասորիների «Աթուր» միության անդամ, Սունդուկյանի անվան ակադեմիական թատրոնի դերասան Ռազմիկ Խոսրոեւը։
Անդրադառնալով ասորիների ցեղասպանությանը՝ նա նշել է. «Մենք բոլորս՝ հայերն ու ասորիները, հատկապես ասորիները, որոնք պետություն չունեն, տառապում ենք թերարժեքության բարդույթով։ Պետք է լուծել հենց այս խնդիրը։ Տա աստված, որ Հայոց ցեղասպանության 100-րդ տարելիցը միայն միջոցառումներով չսահմանափակվի»։ Ռազմիկ Խոսրոեւը հույս է հայտնել, որ տեղի կունենա ինչ-որ իրադարձություն, որը կստիպի ամբողջ աշխարհին սթափվել։ Նրա համոզմամբ, եթե ԱՄՆ-ն ճանաչի Հայոց ցեղասպանությունը, ապա դա կվերաբերի նաեւ ասորիներին, քանի որ վերջին 5-6 տարիների ընթացքում ասորիների, հույների ցեղասպանությունները դիտարկվում են Հայոց ցեղասպանության շրջանակներում։ «Եթե աշխարհը Թուրքիային ինչ-ինչ պահանջներ ներկայացնի, ապա ասորիներն անմասն չեն մնա»,-ընդգծել է նա։
Օգոստոսի 7-ը Ասորիների համաշխարհային ասոցիացիայի կողմից սահմանվել է որպես Ասորիների ցեղասպանության օր։
Leave a Reply