Օգոստոսի 4-ին Բելգիայի Լիեժ քաղաքում տեղադրվել է Օսմանյան կայսրությունում ասորիների ցեղասպանությանը` Սեյֆոյին (Սեյֆո- ասորերենում նշանակում է «սուր» և խորհրդանշում է 1915թ. Օսմանյան կայսրությունում քրիստոնյա ասորիների, հայերի և պոնտացի հույների դեմ իրագործված ցեղասպանությունները) նվիրված հուշարձան, հաղորդում է Fırat գործակալությունը: Հուշարձանի բացման արարողությանը մասնակցել են Եվրոպայի տարբեր երկրներից ժամանած ասորիներ, ինչպես նաև` հայեր և քրդեր: Հուշարձանի տեղադրումն իրականացվել է Բելգիայի ասորական ինստիտուտի և «Սեյֆո» կենտրոնի նախաձեռնությամբ:
«Սեյֆո» կենտրոնի տնօրեն Սաբրի Աթմանը Fırat-ին տված հարցազրույցում ասել է, որ հուշարձանի տեղադրման աշխատանքները թեև տևել են 18 ամիս, սակայն միայն տեղադրումից երկու շաբաթ առաջ է հայտարարվել այդ մասին: Նա ասել է, որ գաղտնի պահելու պատճառը թուրքական պետության` հուշարձանի տեղադրումը խոչընդոտելու վտանգն էր: Սաբրի Աթմանը պատմել է նաև, որ լուրն իմանալուն պես Բրյուսելի թուրքական դեսպանությունը գործի է անցել` ասորական ընկերություններին սպառնալով չմասնակցել հուշարձանի բացման արարողությանը: Թեև Թուրքիայի հարուցած բոլոր խոչընդոտներին` հուշարձանը տեղադրվել է: Սաբրի Աթմանի խոսքով` դա շատ լավ պատասխան է Թուրքիայի ժխտողական քաղաքականության դեմ:
Սաբրի Աթմանն հայտնել է, որ մեկ ամսից նման հուշարձան է տեղադրվելու նաև Աթենքում:
Ասորիների ցեղասպանությանը նվիրված հուշարձաններ են տեղադրվել նաև Հայաստանում, Ֆրանսիայում, Ավստրալիայում և ԱՄՆ-ում:
Աշխարհով մեկ սփռված ասորիները ջանքեր են գործադրում, որ միջազգային հանրությունը ճանաչի 1915թ. իրենց դեմ գործված ցեղասպանությունը:
Leave a Reply