Ներկայում Թուրքիայի տարածքում գտնվող Մուշ քաղաքում Հայոց ցեղասպանությունից հետո մինչ օրերս կանգուն մնացած հայկական տների քանդման դադարեցման որոշում է կայացվել, սակայն այդ տների 80 տոկոսն այլեւս չկա։ (Ֆոտոռեպորտաժ)
NEWS.am-ի թղթակիցը Մուշի Քալե (Բերդ, Մուշեղի բերդ) թաղամասում քանդվող պատմական հայկական տների հետ կապված զրուցել է տեղի քուրդ եւ սակավաթիվ հայ բնակիչների հետ։ Զրույցի ընթացքում Մուշի բնակիչների մի մասը պնդում էր, թե պետք չէ քանդել պատմական տները, քանի որ դրանք կարող են տուրիզմի համար ծառայել, իսկ մի մասն էլ համոզված էր, որ տները պատմական չեն, քանի որ դրանք վերանորոգումների են ենթարկվել եւ պատմական տեսքը կորել է, ուստի քանդումը նորմալ է։
Մուշի պատմական հայկական տների քանդումն այնպես արագ իրականացվեց, որ մինչ Վանի պահպանության խորհրդի մասնագետները տեղում սկել էին ուսումնասիրություններ կատարել եւ գրանցել տներից մեկը, պատմական տների 80 տոկոսն արդեն քանդվել էր։
Նշվում է, որ անհրաժեշտ է գոնե գրանցել մեկ կամ երկու փողոց՝ պահպանելու թաղամասի դիմագիծը։
Նշենք, որ Մուշի քաղաքապետարանը քանդում է Քալե թաղամասի պատմական տները՝ տեղում բազմաբանակարան շենքեր կառուցելու նպատակով։
Այս խնդրին են անդրադարձել Մուշից ընտրված պատագամավորներ Դեմիր Չելիքը եւ Սըրրը Սաքըքը՝ հայտարարելով, թե Ցեղասպանության ենթարկված հայ ժողովրդից մնացած պատմական տները քաղաքային զարգացման նախագծի անվան տակ չեն կարող պատմությունից ջնջել։
Այս ամենը բողոքի ալիք է բարձրացրել Ստամբուլի հայ համայնքի եւ թուրք առաջադեմ գործիչների մոտ։
Հայկական տների քանդման դեմ ստորագրահավաքին է միացել նաեւ Ռագըփ Զարաքոլուն՝ նշելով. «Այս երկրում 1915-ի հաշիվը չպահանջելու պատճառով այսօր բոլոր բնիկ ազգերի (հայեր, հույներ, ասորիներ, քրդեր) նկատմամբ շարունակվում է համակարգված կոտորածը։ 1915-ին սկսված ցեղասպանությունն այսօր շարունակվում է որպես մշակութային եւ տնտեսական ցեղասպանություն։ Ժողովուրդների եղբայրության եւ հավասարության անունից քանդման դեմ մեկ ստորագրություն էլ դու դիր http://imzakampanyam.com»:
http://news.am/arm/news/165188.html
Leave a Reply