«Քրդստանի աշխատավորական կուսակցության» (PKK)` Թուրքիայի տարածքից դուրս գալու գործընթացին անմիջականորեն հետևելու համար թուրք-իրաքյան սահման են ժամանել Անկարայում Ճապոնիայի դեսպանատան աշխատակիցների խումբը:
Ճապոնացի դիվանագետներն ուղևորվել են Թուրքիայի Շըրնաք նահանգ, որը սահմանակից է Հյուսիսային Իրաքի քրդական ինքնավարությունը, որտեղ էլ ուղևորվում են Թուրքիան լքող PKK-ականները:
«Ամբողջովին աջակցում ենք խաղաղությանն ուղղված այս գործընթացին»,-նշել են Ճապոնիայի դեսպանատան ներկայացուցիչները, ովքեր տեղում են հետևելու քրդական ուժերի դուրսբերմանը:
Հիշեցնենք, որ մարտի 21-ին Դիարբեքիրի հրապարակում, որտեղ մեկ միլիոնից ավել քուրդ էր հավաքվել` տոնելու Նովրուզը, քրդական խորհրդարանական Խաղաղություն և ժողովրդավարություն կուսակցության պատգամավորները քրդերենով և թուրքերենով ներկայացրել են թուրքական բանտում ցմահ ազատազրկում կրող քուրդ առաջնորդ Աբդուլլահ Օջալանի խաղաղության ուղերձը:
Ուղերձում քուրդ առաջնորդը կոչ էր արել PKK-ին վայր դնել զենքն ու լքել Թուրքիայի տարածքը: Օջալանը նաև նշել էր, որ ժամանակն է եկել պայքարը տեղափոխել քաղաքական դաշտ և ժողովրդավարական ձևով լուծել առկա խնդիրները:
Այսպիսով, հիմք է դրվել թուրք-քրդական հակամարտության կարգավորման գործընթացին, որին Թուրքիայում տվել են «լուծման գործընթաց» անունը:
Ապրիլի վերջին քրդական կազմակերպության ղեկավարները հայտարարեցին, որ մայիսի 8-ին PKK-ականները սկսում են լքել Թուրքիայի տարածքը, սակայն զենքերը չեն հանձնելու:
Այս ամենի շրջանակում Թուրքիայում ստեղծվեց 64 հոգանոց «Մտավորականների հանձնաժողով», որի կազմում ընդգրկվել են թուրք և քուրդ գիտնականներ, արվեստագետներ, լրագրողներ: Հանձնաժողովում է նաև պոլսահայ հայտնի լրագրող Էթյեն Մահչուպյանը: Այս հանձնաժողովը կոչված է լուծումներ առաջարկելու թուրք-քրդական հակամարտության կարգավորման գործընթացի համար:
Leave a Reply