Հունաստանի խորհրդարանը քննարկում է ցեղասպանությունների ժխտումը քրեականացնող օրինագիծը

Հունաստանի խորհրդարանի խոշորագույն՝ վարչապետ Անտոնիս Սամարասի Նոր ժողովրդավարություն կուսակցությունը, խորհրդարանի քննարկմանն է ներկայացրել օրինագիծ, որով քրեական պատասխանատվություն է սահմանվում քսենոֆոբիայի դրսևորման և Ցեղասպանությունն ու Հոլոքոստը հերքելու համար: Այս մասին հաղորդում է RIA Novosti-ն:

Օրինագծի քննարկումը, որը կոչվել է հակառասիստական, պառակտում է առաջացրել հասարակության մեջ: Շատերն այն համարում են հակասահմանադրական:

Նոր ժողովրդավարության կարևորագույն նախաձեռնություններից է դարձել առաջարկը՝ քրեական պատիժ սահմանել Հունաստանի խորհրդարանի կողմից ճանաչված ցեղասպանությունների հանցագործություններին, Հոլոքոստին, միջազգային կամ հունական դատարանի կողմից դատապարտված նացիզմի հանցագործություններին հավանություն տալու համար:

Նրանց համար, ովքեր միտումնավոր կերպով հրապարակայնորեն, մամուլի, համացանցի կամ ցանկացած այլ միջոցով կաջակցեն կամ կթերագնահատեն ցեղասպանությունների, նացիզմի, Հոլոքոստի հանցագործությունների ծանրությունը, նախատեսվում է ազատազրկում՝ 3 ամսից մինչև 3 տարի ժամկետով, և տուգանք՝ 5000-20 հազար եվրոյի չափով:

Նման պատիժ է նախատեսվում նաև նրանց համար, ովքեր ատելություն կամ բռնություն են հրահրում ռասայական, կրոնական, ծագման, էթնիկական հողի վրա, ինչպես նաև նրանց համար, ովքեր անդամակցում են քսենոֆոբիական կամ ռասիստական կազմակերպությունների: Իրավական անձինք կարող են տուգանվել 10 հազարից 100 հազար եվրոյով և 10 տարի ազատազրկմամբ:

Այս դրույթները չեն տարածվում պետության և վերջինիս մարմինների, հանրային իրավունքի իրավական անձանց և հանրային իրավունքի շրջանակներում միջազգային կազմակերպությունների վրա:

Օրինագիծը ստորագրել են կուսակցության և կառավարության գրեթե բոլոր անդամները:

http://www.1in.am/arm/world_weurop_187913.html