Գերմանացի ցեղասպանագետն արժանացավ ՀՀ նախագահի մրցանակի

Մայիսի 29-ին Հայոց ցեղասպանության ճանաչման գործում նշանակալի ավանդ ներդնելու անվանակարգով ՀՀ նախագահի մրցանակի արժանացավ նաեւ գերմանացի նշանավոր հայագետ, ցեղասպանագետ, իրավապաշտպան Թեսսա Հոֆմանը: “Ի դեմս տիկին Հոֆմանի, այսօր մենք ճանաչում ենք եվրոպական ու գերմանական հումանիստական ավանդույթը, որն իր ձայնն էր բարձրացնում տառապանքի ուղիներ անցնող հայ ժողովրդի համար”,- ասաց նախագահ Սերժ Սարգսյանը:

Թեսսա Հոֆմանը ավելի քան 40 տարի զբաղվում է Հայոց ցեղասպանության ուսումնասիրությամբ: Նա նախ շնորհակալություն հայտնեց մրցանակի համար, եւ քանի որ դահլիճում էր Գերմանիայի դեսպանը, նա` որպես իր պետության ներկայացուցիչ, կոչ արեց Հայոց ցեղասպանության 100-րդ տարելիցին ընդառաջ ընդունել պատշաճ բանաձև Հայոց ցեղասպանության վերաբերյալ:

Իսկ իր ստացած մրցանակի մի մասը տրամադրելու է Բեռլինում Հայոց ցեղասպանության զոհերի հիշատակին նվիրված հուշարձանի կառուցմանը, մյուսը` ապրիլի 24-ին Կոստանդնուպոլսում ձերբակալված հայ 15 գրողների գործերի թարգմանություններին: 

Ըստ Հոֆմանի, Հայոց ցեղասպանության 100-րդ տարելիցին ընդառաջ պետք է ճանաչել Ցեղասպանությունը, որն էլ կնշանակի կանխարգելում:

http://henaran.am/news_view.php?post_id=23781