Ոճրագործ Օգյուն Սամասթին կրկին կանչել են հարցաքննության

Թուրքիայի վճռաբեկ դատարանի կողմից «Ակօս» պարբերականի նախկին գլխավոր խմբագիր Հրանտ Դինքի սպանության վերաբերյալ նախկին վճռի բեկանումից հետո դատական գործը կրկին տեղափոխվել է դատարան: «Արմենպրեսը»` վկայակոչելով թուրքական CNN Turk-ին, տեղեկացնում է, որ դատարանն առաջիկա օրերին կհրապարակի դատական նիստի անցկացման օրը:

Մայիսի 15-ին Թուրքիայի վճռաբեկ դատարանը բեկանել էր Ստամբուլի ծանր հանցագործությունների դատարանի 2012 թվականի հունվարի 17-ին ընդունած վճռի այն կետը, որում նշվել է, որ Հրանտ Դինքի սպանության հետեւում «զինված ահաբեկչական կազմակերպություն» կանգնած չէ: Իսկ նոր հետաքննություն իրականացնելու նպատակով մայիսի 28-ին նոր հարցաքննության էր կանչվել Դինքի մարդասպան Օգյուն Սամասթը:

Հիշեցնենք, որ սպանությունը կատարած Օգյուն Սամասթը դատապարտվել է 22,5 տարվա ազատազրկման: Իսկ գործով անցնող 19 մեղադրյալներից 13-ը դատարանի դահլիճից ազատ են արձակվել «զինված ահաբեկչական կազմակերպության անդամ» չլինելու հիմնավորմամբ:

http://azg.am/AM/2013053004