Լրագրողների պաշտպանության հանձնաժողով (Committee to Protect Journalists, կենտրոնակայանը՝ ԱՄՆ, Նյու Յորք) իրավապաշտպան կազմակերպությունը Թուրքիայի իշխանություններին հորդորել է բեկանել հայ բլոգեր, լրագրող Սևան Նիշանյանին ազատազրկելու մասին դատավճիռը և հետաքննել նրա հասցեին Twitter սոցիալական կայքում հնչեցված սպառնալիքները:
Հիշեցնենք, որ Ստամբուլի շրջանային դատարանը մայիսի 22-ին Նիշանյանին 1 տարի 3,5 ամսվա ազատազրկման դատապարտեց՝ «մուսուլմանների կրոնական արժեքները հրապարակավ վիրավորելու» մեղադրանքով: Նիշանյանի դեմ քրեական գործ հարուցելու համար պատճառ էր հանդիսացել աղմկահարույց «Մուսուլմանների անմեղությունը» ֆիլմի (լույս տեսավ 2012թ-ին և «ալեկոծեց» մուսուլմանական աշխարհը, կինոժապավենում իսլամի հիմնադիր Մուհամմադ մարգարեն ներկայացվում է որպես կնամոլ, որը ժամանակ առ ժամանակ կենակցում է նաև տղամարդկանց հետ…-Tert.am) առնչությամբ Նիշանյանի արած գրառումը: Լրագրողն իր բլոգում գրել էր, որ «Մուհամմադ մարգարեին վիրավորելը և նրա հասցեին կատակներ անելը հանցագործություն չէ»:
«Զգայուն հարցերի վերաբերյալ իր կարծիքը հայտնած լրագրողին ազատազրկելը հարիր չէ ազատ և բաց հասարակությանը»,-հայտարարել է Լրագրողների պաշպանության հանձնաժողովի Եվրոպայի և Կենտրոնական Ասիայի ծրագրերի համակարգող Նինա Օգնիանովան և հավելել,-Վերաքննիչ դատարանը պետք է բեկանի Սևան Նիշանյանի դեմ կայացված վճիռը»:
Դատավճռի հրապարակումից օրեր անց սոցիալական ցանցերի թուրքական տիրույթում Նիշանյանի հասցեին սպառնալիքներ էին հնչեցվել: Մասնավորապես, Ֆուրքան անունով օգտատերը Twitter-ում սպառնացել էր, թե «Նիշանյանին սպանելու են այնպես, ինչպես «Ակօս» թերթի խմբագրապետ Հրանտ Դինքին (սպանվել է 2007թ. հունվարին, «Ակօսի» շենքի առջև-Tert.am): «Մոտ է այն ժամանակը, երբ դու կընկնես «Ակօսի» շենքի առջև՝ գլխիդ արձակված գնդակից: Քեզ խելոք պահիր»,-գրել է նա:
Նինա Օգնիանովան թուրք իրավապահներին կոչ է արել հետաքննել «Թվիթերում» հնչեցված սպառնալիքները: «Մենք Թուրքիայի իշխանություններին կոչ ենք անհապաղ հետաքննել սպառնալիքներն ու հեղինակներին պատասխանատվության ենթարկել»,-նշել է նա:
Leave a Reply