Թուրքիայում գործող «Այքըրըդողրուլար» կայքի հայազգի լրագրող Ջևաթ Սինեթն իր հոդվածներից մեկի հրապարակումից հետո հետաքրքիր նամակ է ստացել Թուրքիայում ծնված և ներկայում Գերմանիայում բնակվող Քերեմ Օքթայ անունով օգտատիրոջից:
Օքթայը պատմում է իրենց գյուղի մասին, որտեղ նախկինում հայեր են ապրել: Նա նաև առաջարկում է հետ վերադարձնել իրենց ընտանիքի սեփականություն հանդիսացող հողատարածքը դրանց իրական տերերին` հայերին:
«Ես Երզնկայի Մերմերլի գյուղից եմ: Գյուղն անվանում են նաև Հերդիֆ-Հերդիջ: Ներկայում գյուղի մասին շատ տեղեկություններ չգիտեմ: Սակայն մանուկ ժամանակ գիտեինք, որ այստեղ հայեր են ապրել: Մեր ժամանակով գյուղում միայն երկու հայ կին էր մնացել: Նրանց պատմությունը լավ չգիտեի:
Գիտեմ, որ 1915 թվականի հունիսին մեր շրջանում 20 հազար հայ էր կոտորվել: Մարդկության դեմ այս հանցագործությունն իրականացրել էին շրջակայքի քրդական գյուղերի բնակիչները:
Գյուղում դեռ հայերին պատկանող մի քանի կառույց է մնացել: Մեր ընտանիքին պատկանող դաշտում երկու պատ կար, որոնք 3-4 մետր բարձրություն ունեին: Երբ փոքր ժամանակ մոտենում էինք այդ պատերին, մայրս շատ էր բարկանում և ասում, որ «դրանք կարող են փուլ գալ. դրանք հայերին են պատկանում»: Մայրս միշտ ասում էր` դաշտում թափված քարերը հավաքեք այդ պատերի մոտ:
Գյուղում այդ «սեփականությունը» միայն իմը չէ: Ովքեր կարծում են, թե դա նաև իրենց հողն է, կարող են դիմել ինձ, ցանկանում եմ վերադարձնել այն: Չգիտեմ, թե ինչպես կարելի է դա անել: Եվրոպայում եմ ապրում, Թուրքիայի թղթաբանությանը լավ տեղյակ չեմ»,-իր նամակում գրել է Օքթայը:
Նշենք, որ նամակի հեղինակը չի հայտնում` ինքն ազգությամբ թո՞ւրք է, քո՞ւրդ, թե՞ այլ էթնիկ խմբի է պատկանում:
Թարգմանությունը` Գևորգ Պետրոսյան, «Թուրքագիտական պորտալ»
allTurkey.am
Leave a Reply