Թուրքիայի Մալաթիայի քաղաքապետարանի կողմից 2012 թ. փետրվարի 2-ին հայկական գերեզմանատանը կառուցման փուլում գտնվող պահակատան եւ վերջին հրաժեշտի համար նախատեսված շենքերի ավերումից հետո դրանք կրկին վերանորոգվել են եւ շուտով կհանձնվեն Մալաթիայի հայերին։
Թուրքական Taraf պարբերականի հետ զրույցում Մալաթիայի հայ համայնքը ներկայացնող HAYder միության նախագահ Խոսրով Քյոլեթավիթօղլուն հայտնել է, որ գերեզմանատան ավերված շինությունների շինարարությունն արդեն ավարտվել է, եւ հունիսի 29-ին տեղի կունենա դրանց բացումը։
Խոսրով Քյոլեթավիթօղլուն նշել է, որ այս տարի Մալաթիայի նահանգում տեղի կունենան մշակութային տուրեր, որոնց ընթացքում մասնակիցները կայցելեն Մալաթիայի հայկական գերեզմանատան նորակառույց մատուռ (վերջին հրաժեշտի համար նախատեսված շենք), վերանորոգման մեջ գտնվող Մալաթիայի Սուրբ Երրորդություն եկեղեցի եւ Սուրբ Գրիգոր Լուսավորիչ վանական համալիր, Օրդուզու, Քարաքայայի ջրամբար, Քյուլլուի քարանձավ, Դարենդե Լեւենթ հովիտ, Գյուրփընարի ջրվեժ եւ Հեքիմհանի եկեղեցիներ, Գյուզելյուրթի հին եկեղեցի, Արաբկիրի եկեղեցի։
Նշենք, որ 2012 թ. փետրվարի 2-ին Մալաթիայի քաղաքապետարանի հանձնարարությամբ քանդվել են Մալաթիայի հայերի գերեզմանոցում կառուցվող պահակատունն ու մատուռը։ Այս դեպքը բողոքի ալիք էր բարձրացրել Թուրքիայում եւ Թուրքիայից դուրս, որից հետո Մալաթիայի քաղաքապետը պնդել էր, թե շինությունները սխալմամբ են քանդել եւ խոստացել պետության հաշվին վերականգնել վնասը։
Leave a Reply