Ցեղասպանության հարցում ԱՄՆ դիրքորոշումը միտված է հայ եւ թուրք ժողովուրդների հաշտեցմանը: Եւ այդ դիրքորոշման արտահայտման համար ընտրվում են այնպիսի բառեր, որոնք համապատասխանում են ամերիկյան քաղաքականությանը: Այդ մասին մայիսի 24-ին հայտարարել է Հայաստանում ԱՄՆ դեսպան Ջոն Հեֆերնը` ելույթ ունենալով «Հետքերով որբերի հայոց» լուսանկարների ցուցահանդեսի կապակցությամբ հրավիրված ասուլիսին:
«Ցեղասպանության հարցում մեր քաղաքականությունը ներկայացվում է ապրիլի 24-ին նախագահի ամենամյա ուղերձում: Ուղերձը շատ հստակ է, դրա մեջ միանշանակ ընդունվում են փաստերը, նշվում է, որ Օսմանյան կայսրության գոյության վերջին տարիներին 1,5 մլն հայեր ոչնչացվել եւ տեղահանվել են»,- ասել է դիվանագետը` հավելելով, որ դա 20-րդ դարի մեծագույն հանցագործություններից է:
Հեֆերնի խոսքով, ԱՄՆ քաղաքականությունը հիմնված է հայ եւ թուրք ժողովուրդների հաշտեցման անհրաժեշտության վրա, եւ ԱՄՆ նախագահի խոսքերը բխում են հենց այդ քաղաքականությունից: «Ընտրվում են այնպիսի բառեր, որոնք, մեր համոզմամբ, կնպաստեն հաշտեցման գործընթացին»,- ասել է նա:
Նշենք, որ Նարեկացի արվեստի միության, Մերձավոր Արեւելքի հիմնադրամի եւ ԱՄՆ դեսպանության համատեղ ծրագրով մայիսի 25-ին կայանալու է «Հետքերով որբերի հայոց» խորագիրը կրող լուսանկարների ցուցահանդեսի բացումը Հայաստանի ազգային պատկերասրահում:
Leave a Reply