Խստորեն դատապարտում ենք պոլսահայ լրագրողի ազատազրկումը. «Լրագրողներ առանց սահմանների»

«Լրագրողներ առանց սահմանների» միջազգային կազմակերպությունը խստորեն դատապարտում է մայիսի 22-ին Ստամբուլի ընդհանուր իրավասության 14-րդ դատարանի որոշումը, ըստ որի՝ պոլսահայ լրագրող Սևան Նիշանյանն իր բլոգում Մուհամեդ մարգարեին վիրավորելու մեղադրանքով դատապարտվել է 13,5 ամսվա ազատազրկման, հաղորդում է կազմակերպության պաշտոնական կայքը:

 «Նիշանյանի ազատազրկումը տեղեկատվության ազատության ոտնահարում է և ահազանգ՝ ուղղված լրագրողների ու բլոգերների միջազգային համայնքին, – ասված է կազմակերպության հայտարարության մեջ: – Դատավճիռը պետք է բեկանվի վերաքննիչ դատարանում: Իսլամը քննադատողների ճնշումն անընդունելի է Թուրքիայի պես աշխարհիկ երկրում»:

Կազմակերպությունը թուրք օրենսդիրներին կոչ է անում Քրեական օրենսգրքից վերացնել 216-3 հոդվածը՝ այն դաժան դրույթը, որը մի շարք հետապնդումների հիմք է հանդիսացել:

Նիշանյանը մեղադրվում է  2012թ. սեպտեմբերի 29-ին իր բլոգում գրառման համար, ի պատասխան որի` 15 բողոք է ստացվել: Նիշանյանին մեղադրանք է առաջադրվել քրեական օրենսգրքի 216 հոդվածով՝ «կրոնական արժեքները նվաստացնելու» համար:

http://civilnet.am