Թուրքիայի զինված ուժերի գլխավոր շտաբը հրապարակել է հետաքննության արդյունքները` կապված 2011 թվականին PKK-ի դեմ գործողությունների ժամանակ քիմիական զենք օգտագործելու մեղադրանքների հետ:
2011 թվականի հունվարի 11-ին Չուքուրջա շրջանում թուրքական բանակի հատուկ գործողության հետևանքով «Քրդստանի աշխատավորական կուսակցության» (PKK) սպանված անդամների ազգականները դիմել էին դատախազություն:
15 հայցվորները մեղադրում էին թուրք զինծառայողներին` քրդական կազմակերպության անդամների դեմ քիմիական զենք կիրառելու մեջ: Սպանված PKK-ականների ազգականները նրանց մարմինների վրա տարօրինակ վերքեր էին հայտնաբերել, որոնք նման էր քիմիական զենքի ազդեցության դեպքում ի հայտ եկող վնասվածքներին:
Գործով զբաղվել էր Թուրքիայի ռազմական դատախազությունը, որն էլ հրապարակել է հետաքննության արդյունքները:
Ըստ ռազմական դատախազության` փորձաքննության ժամանակ քիմիական զենքի կիրառման որևէ հետք չի հայտնաբերվել:
Թուրքիայի ռազմական դատախազության հետաքննության արդյունքներում նշվել է, որ
– ռազմական գործողության նախապատրաստման և իրականացման ժամանակ մասնակիցները պատրաստված չեն եղել քիմիական զենքով մարտ վարելու, չեն ունեցել հատուկ պաշտպանական հարմարանքներ և այլն
– Թուրքիայի գլխավոր շտաբի ենթակայության տակ քիմիական զենք չի հայտնաբերվել
– տարածքում չի նկատվել ամպ, որը գոյանում է քիմիական զենքի կիրառման ժամանակ
– ռմբակոծությունների ժամանակ հակառակորդը մարտադաշտում մշտապես տեղաշարժվել է
– մարտի դաշտում խարույկներ են վառվել
– մարտի ավարտից հետո զինծառայողներ և քաղաքացիներ են մտել հակառակորդի զբաղեցրած տարածք
– PKK-ականների մարմիններն ուսումնասիրելիս քիմիական զենքի հետք չի հայտնաբերվել
– քիմիական զենքի կիրառման հետք չի հայտնաբերվել նաև տարածքից վերցված հողի և այլ նյութերի փորձանմուշներում:
Նշենք, որ ներկայիս Թուրքիայի հարավ-արևելյան հատվածում գտնվող քրդաբնակ Հաքքարի նահանգի Չուքուրջա շրջանում թուրքական բանակի ստորաբաժանումների և PKK-ի խոշոր խմբի միջև տեղի ունեցած մարտերի ժամանակ 50-ից ավել PKK-ական էր սպանվել (ըստ տարբեր աղբյուրների), 24 թուրք զինծառայող (ըստ պաշտոնական տվյալների):
Աղբյուր` «Թուրքագիտական պորտալ»
Leave a Reply