Թուրքիայի նախագահ Աբդուլլահ Գյուլի կինը` Հայրունիսա Գյուլը, անդրադարձել է այդ երկրում պատմական նշանակություն ունեցող շինությունների ոչնչացման և սխալ վերականգնման խնդրին:
Ստամբուլում գտնվող «Էմեք» կինոթատրոնի շենքն ապամոնտաժելու հարցը մեծ աղմուկ է բարձրացրել հարևան երկրում: Թեև հասարակության ուժեղ բողոքին, պատմական շինությունն արդեն սկսել են քանդել:
Թուրքիայի առաջին տիկինը ևս ափսոսանք է հայտնել «Էմեք» կինոթատրոնի շենքի ոչնչացման կապակցությամբ, ինչպես նաև նշել է, որ շատ վայրերում ինքն ուղղակի աչքերը փակում է, որպեսզի չտեսնի, թե ինչի են վերածվել պատմական շենքերը:
Հայրունիսա Գյուլը նաև ուշադրություն է հրավիրել պատմական արժեքավոր շենքերի վատ, անորակ և դիմագիծն ամբողջովին փոխող վերականգնումների և վերանորոգումների վրա: Որպես օրինակ, Թուրքիայի առաջին տիկինը նշել է Կեսարիա քաղաքում գտնվող նահանգապետարանի շենքը, որը կառուցել են հայ վարպետներն ու ճարտարապետները:
«Սխալ վերականգնման մի օրինակ էլ Կեսարիայի նահանգապետարանի շենքն է: Այն անչափ գեղեցիկ շինություն է` կառուցված տեղի քարերից հայ վարպետների և ճարտարապետների կողմից:
Որոշ ժամանակ առաջ այնտեղ վերանորոգման աշխատանքներ էին: Երբ այն ավարտվեց, շենքը զգալի փոխվել էր: Շենքի որոշ հատվածներ այնպես էին ներկել, որ այն ամբողջովին կորցրել էր իսկական դիմագիծը: Ես հատուկ խնդրեցի, որպեսզի այդ ամենը փոխեն և վերականգնեն նախկին տեսքը»,-լրագրողների հետ զրույցում հայտարարել է Հայրուննիսա Գյուլը:
Աղբյուր` «Թուրքագիտական պորտալ»
Leave a Reply