«Թուրքիայում ազգայնականությունը սերտաճել է կրոնամոլության հետ»

Եզրակացնում է ԱՄՆ պետքարտուղարության զեկուցագիրը:

Հրապարակվել է ԱՄՆ պետքարտուղարության «Միջազգային կրոնական ազատությունների» զեկուցագիրը: Դրա` Թուրքիային վերաբերող հատվածը առաջացրել է թուրքական կառավարամետ լրատվամիջոցների տարակուսանքը: Ինչո՞ւ: Հարցին պատասխանում է զեկուցագրի համապատասխան հատվածը:

Ըստ զեկուցագրի` թուրքական սահմանադրությունն ու օրենքը թեեւ ընդհանուր առմամբ պաշտպանում են կրոնական ազատությունները երկրում, սակայն առկա են նաեւ կրոնական խմբավորումների իրավունքների սահմանափակման բազում դեպքեր: Զեկուցագրում նշվում է. «Ուղղափառ հույները, հայերը եւ ասորիները, նրանց հետ նաեւ հայ բողոքականներն ու հրեական համայնքը օգտվում են դավանանքի ազատությունից: Ավելին` շարունակվում է առգրավված կալվածքների վերադարձը համայնքներին: Սակայն թուրքական կառավարությունն առ այսօր հապաղում է հույն ուղղափառ եկեղեցու ճեմարանի բացման հարցում, որը 40 տարի առաջ է փակվել»:

Ինչ վերաբերում է իրավունքների սահմանափակումներին, դրանց թիրախն են դառնում եզդիներն ու հատկապես ալավիները: Ինչպես նշված է զեկուցագրում, թուրքական պետությունը ալավիներին դիտում է որպես հերետիկոս մահմեդականների, այս խտրականությունը պայմանավորում է երկրում աշխարհիկ կարգերը պահպանելու պատճառաբանությամբ, իսկ սուննիներին տրամադրում առանձնաշնորհյալ կարգավիճակ:

Զեկուցագիրն անդրադառնում է հակահրեական դրսեւորումներին, ապա եւ եզրակացնում. «Երկրում ազգայնականությունը սերտաճել է կրոնամոլության հետ, հետեւաբար դժվար է էթնիկ անհանդուրժողականությունը զանազանել կրոնական անհանդուրժողականությունից»: Զեկուցագրին երեկ արձագանքել էին թուրքական լրատվամիջոցները, մասնավորապես «Ռադիկալ» թերթը:

Հ. Չ.

http://azg.am/AM/2013052202