Արգելվել է Վանա կատվին Վանի նահանգից դուրս հանել

Վանի հարյուրամյա համալսարանին կից Վանա կատուների ուսումնասիրության եւ պահպանման կենտրոնն արգելել է Վանա կատվին դուրս հանել Վան նահանգի սահմաններից։

Ստամբուլի հայկական «Ակօս»-ի փոխանցմամբ՝ Վանի հարյուրամյա համալսարանին կից Վանա կատուների ուսումնասիրության եւ պահպանման կենտրոնը որոշում է կայացրել արգելել Վանա կատուներին նահանգի սահմաններից դուրս հանելը եւ այն, որպես նվեր, այլ նահանգներ ուղարկելը, քանի որ վտանգի տակ է տվյալ տեսակի գոյությունը։

Կենտրոնի ղեկավար Աբդուլլահ Քայան նշել է, թե իրենք չեն սահմանափակվել միայն կատուների դուրսհանումը արգելելով, այլ նաեւ փորձում են իրենց կենտրոնում գտնվող կատուները համալրել առողջ Վանա կատուներով։ Նա նշել է, թե Վանա կատուն նահանգի հարստությունն է, եւ այն տեսնել ցանկացողները պետք է այցելեն իրենց կենտրոն։

Նշենք, որ Վանա կատուներն ապրում են Վանա լճի շրջակայքում, որտեղից էլ առաջացել է նրանց անվանումը: Վանա կատվի աչքերը լինում են 3 տեսակի` երկնագույն աչքերով, դեղին գույնի տարբեր երանգներով եւ այնպիսիք, որոնց աչքերը տարբեր գույններ ունեն` երկնագույն եւ դեղին:

Վանա կատուները շատ համարձակ են, որսում են մկներ, մողեսներ, թռչուններ: Նրանք ուտում են նաեւ մրգեր: Յուրահատուկ են նրանով, որ սիրում են ջրում լողալ: Ավանդույթի համաձայն` Վանա կատուները մտնում են Վանա լիճ եւ որսում լճի միակ ձկանը` Վանա տառեխին:

http://news.am/arm/news/154131.html