ԱՄՆ օրենսդիրները նաև ի շահ Թուրքիայի շահարկում են Հայոց ցեղասպանության հարցը

ԱՄՆ-Թուրքիա դաշնակցային հարաբերությունների հավաստումը Կոնգրեսում Հայոց ցեղասպանության ճանաչման սինուսոիդն է:

Մայիս 15-ին Թուրքիայի վարչապետ Էրդողանի ԱՄՆ այցելությունից և ԱՄՆ նախագահ Օբամայի հետ բանակցություններից հետո սպասվում էր, որ հայկական հարցը կրկին կգա օրակարգ:

Եթե ԱՄՆ նախագահը և Թուրքիայի վարչապետը հայտարարում են, որ երկու երկրները համաձայնեցրել են իրենց տեսակետները համաշխարհային քաղաքականության մեջ առկա բոլոր խնդիրներում, ուրեմն սպասենք Հայկական հարցի բարձրացմանը:

Եվ ահա, ամերիկացի մի խումբ օրենսդիրներ Հայոց ցեղասպանության վերաբերյալ նոր օրինագիծ են ներկայացրել ԱՄՆ Կոնգրես: Ինչպես հաղորդում է Ամերիկայի Հայ դատի հանձնախումբը, «Հայոց ցեղասպանության մասին ճշմարտության և արդարության ակտ» կոչվող օրինագծում ԱՄՆ նախագահ Բարաք Օբամային կոչ է արվում քայլեր ձեռնարկել հայ-թուրքական հարաբերությունները բարելավելու ուղղությամբ:

Ընդ որում, բանաձևում նշվում է, որ հայ-թուրքական հարաբերությունների կարգավորման հիմքում պետք են լինեն «Թուրքիայի կողմից Հայոց ցեղասպանության փաստի և հետևանքների լիարժեք ճանաչման» հարցը: Փաստաթղթի հեղինակներն են ԱՄՆ Կոնգրեսի ստորին՝ Ներկայացուցիչների պալատի անդամներ Մայքլ Գրիմը, Ադամ Շիֆը, Ֆրենկ Փալոնեն և Դեյվիդ Վալադոն: Ինչ նպատակ է հետապնդում Թուրքիայի վարչապետ Էրդողանի` ԱՄՆ այցից անմիջապես հետո Հայոց ցեղասպանության հարցի բարձրացումը, եթե Օբաման և Էրդողանը բոլոր հարցերում համաձայնության են եկել:

ԱՄՆ կոնգևրեսն, ինչպես միշտ, կմերժի Հայոց ցեղասպանության ճանաչմանն ուղղակի կամ անուղղակի առնչվող որևէ նախագիծ` դրանով իսկ հավաստելով Թուրքիայի վարչապետին, որ ԱՄՆ նախագահը հավատարիմ է նախնական պայմանավորվածություններին:

Իսկ ԱՄՆ–ի «սերը» Թուրքիայի նկատմամբ կարելի է հավաստել ամենահարմար ճանապարհով:

Հրահրում են հայերին լոբբիի միջոցով Հայոց ցեղասպանության հարցը կրկին բարձրացնել Կոնգրեսում և այն մերժում են՝ ի ցույց դնելով իրենց վճռականությունն այս հարցում Թուրքիային: Հայոց ցեղասպանության հարցը դարձել է «պարապ վախտվա խաղալիք» ԱՄՆ արտաքին քաղաքականության համար:

http://www.armweeklynews.am/awn/m13/m_0252.htm