Ստամբուլահայերը պահանջում են դասագրքերից հանել հայերի դեմ թշնամություն սերմանող նյութերը

Թուրքիայում քրդական հարցի կարգավորման աջակցության համար կառավարության կողմից ստեղծված «Իմաստունների հանձնաժողովի» անդամների հետ հանդիպմանը ստամբուլահայերը պահանջել են պատմության դասագրքերից հանել հայերին, հույներին, ասորիներին եւ հրեաներին թշնամի ներկայացնող նյութերը։

Ստամբուլի հայկական «Ակօս»-ի փոխանցմամբ՝ «Իմաստունների հանձնաժողովի» Մարմարայի հատվածի պատասխանատու խմբի անդամները Ստամբուլի Սուրբ Վարդանանց եկեղեցուն պատկանող Նազար Շիրինօղլուի անվան սրահում հանդիպել են Թուրքիայի ազգային փոքրամասնությունների ներկայացուցիչների հետ՝ քննարկելով քրդական հարցի կարգավորման գործընթացը եւ ազգային փոքրամասնություններին հուզող հարցերը։

Հանդիպման ժամանակ Ստամբուլի Գեդիկփաշայի Սուրբ Հովհաննես եկեղեցու հիմնադրամի նախագահ Հարություն Շանլըն հայտնել է, որ դեռեւս Թուրքիայի պատմության դասագրքերում հայերին, հույներին, ասորիներին եւ հրեաներին թշնամի են ներկայացնում։ Նա շեշտել է, թե անհրաժեշտություն է, որ նման նյութերն անհապաղ հանվեն դասագրքերից։

http://news.am/arm/news/153219.html