Ֆրանսիան` թուրքական աէկի և Ցեղասպանության խնդրի արանքում

Թուրքիայի էներգետիկայի և բնական պաշարների նախարար Թաներ Յըլդըզը կարծում է, որ թուրքական ատոմակայանի կառուցման գործում ֆրանսիական ընկերությունների ներգրավվածությունը կարող է պատճառ դառնալ Հայոց ցեղասպանության խնդրում այդ երկրի դիրքորոշման փոփոխության: Այս մասին հաղորդում է թուրքական Sabah-ն իր մայիսի 13-ի համարում:

Թուրք նախարարը, ըստ ամենայնի, նկատի ունի, որ Ֆրանսայի ներկայիս կառավարությունը կվերանայի իր դիրքորոշումը ցեղասպանությունների, այդ թվում Հայոց ցեղասպանության ժխտումը քրեականացնող օրինագծի ընդունման հարցում:

Հիշեցնենք, որ Թուրքիայի երկրորդ ատոմակայանը կառուցելու հայտամրցույթը շահել էին ճապոնական Mitsubishi և ֆրանսիական Areva SA ընկերությունները:

Թուրքական Milliyet-ն էլ ապրիլի 4-ին գրել էր, որ վերոնշյալ` ցեղասպանությունների ժխտումը քրեականացնող օրինագծի պատճառով պաշտոնական Անկարան չէր ցանկացել, որ ֆրանսիական ընկերությունը միայնակ կառուցի աէկը:

Սինոպում կառուցվելիք Թուրքիայի երկրորդ աէկի շինարարությունը կմեկնարկի 2017թ.:

Ներկայում Թուրքիան ատոմակայան դեռ չունի: Առաջին աէկը կառուցվելու է Միջերկրականի Աքքոյու վայրում: Նախատեսվում է, որ այս աէկի շինարարական աշխատանքները կսկսվեն 2014թ.: Ծրագիրն իրականացնում են ռուսական և թուրքական ընկերությունները:

http://civilnet.am