Հայերի, ասորիների, հույների ցեղասպանությունը ճանաչող Նոր Հարավային Ուելսի խորհրդարանի բանաձևը զայրացրել է Անկարային

Ավստրալիայի Նոր Հարավային Ուելսի նահանգի խորհրդարանի ստորին պալատը` Ազգային ժողովը, այսօր միաձայն ընդունել է 20-րդ դարում հույների ցեղասպանությունը (իրականացվել է 1915–1923 թթ-ին, Օսմանյան կայսրության և քեմալական Թուրքիայի կողմից, զոհվել է 353 հզ. մարդ, 1 մլն 400 հազարը՝ տեղահանվել-Tert.am), ասորիների ցեղասպանությունը (իրականացվել է 1915–1923 թթ-ին, Օսմանյան կայսրության և քեմալական Թուրքիայի կողմից, զոհվել է 700.հազ. ասորի-Tert.am) ճանաչող և Հայոց ցեղասպանության ճանաչումը վերահասատող (իրականացվել է 1915–1923 թթ-ին, Օսմանյան կայսրության և քեմալական Թուրքիայի կողմից, զոհվել է 1, 5 մլն հայ-Tert.am) բանաձևը:

Բանաձևը մարտի 5-ին միաձայն ընդունել էր նաև խորհրդարանի Վերին պալատը՝ Օրենսդրական խորհուրդը:

Փաստաթղթում, մասնավորապես, նշվում է. «Նոր Հարավային Ուելսի խորհրդարանը 1997թ. Հայոց ցեղասպանությունը ճանաչող և դատապարտող բանաձև է ընդունել, իսկ այժմ ճանաչում ենք, որ 1914-1923 թթ. հույներն ու ասորիները ևս Օսմանյան կայսրության կողմից նույն բնույթի ցեղասպանության են ենթարկվել և

-միանում ենք Նոր Հարավային Ուելսի նահանգի հայկական, հունական և ասորական համայնքերին՝ հարգելու նորագույն շրջանում առաջին ցեղասպանությունների զոհ դարձած անմեղ կանանց, երեխաների և տղամարդկանց հիշատակը,

-դատապարտում հայերի, ասորիների և հույների և մյուս ցեղասպանությունները՝ որպես անհանդուրժողականության ծայրահեղ դրսևորում,

-ընդունում ենք համաշխարհային պատմության այդ մութ էջերից դասեր քաղելու և դրանք հիշելու կարևորությունը,

-դատապարտում ենք հայերի, հույների, ասորիների և այլ ցեղասպանությունները ժխտելու կամ խեղաթյուրելու բոլոր փորձերը,

-երախտագիտություն ենք հայտնում Նոր Հարավային Ուելսի բնակիչներին այն մարդասիրական օգնության համար, որ ցուցաբերվել է հայերին, հույներին, ասորիներին, ինչպես նաև Ավստրալիայի կառավարությանը կոչ անում դատապարտել հայերի, հույների, ասորիների ցեղասպանությունները»:

Ավստրալական նահանգի որոշումը վշտացրել է պաշտոնական Անկարային. Թուրքիայի արտգործնախարարությունը հաղորդագրություն է տարածել, որում նշվում է, որ այդ բանաձևը, անկախ ամեն ինչից, բացասական հետևանքներ է ունենալու:
«Մենք խստիվ դատապարտում և չենք ընդունում այդ բանաձևը, որը պատմական փաստերի հետ որևէ առնչություն չունի ….Միանգամայն հստակ է՝ մանրախնդիր քաղաքական հաշվարկներով և իրենց կողմանակալությամբ ու արմատական հայացքներով հայտնի էթնիկ խմբերի լոբբիի ազդեցության ներքո ընդունվող այդ բանաձևերը չեն կարող վերափոխել պատմությունը… Նման նախաձեռնությունների նպատակն է հարված հասցնել թուրք-ավստրալական հարաբերություններին: Կողմնակալ այդ բանաձևը, ճիշտ է, չի փչացնի Թուրքիայի և Ավստրալիայի ժողովուրդների  բարեկամական հարաբերությունները, այդուհանդերձ, իր բացասական հետևանքը կթողնի: Այդ նախաձեռնության հեղինակներն անկասկած կզրկվեն մեր բարեկամությունից և հյուրընկալությունից, որից, սակայն ավստրալացի ժողովուրդը կշարունակի օգտվել»,- նշվում է հայտարարության տեքստում:

Թուրքիայի արտգործնախարարությունը Կանբերային նաև հիշեցրել է, որ իրենց միջև պայմանավորվածություն էր ձեռք բերվել, համաձայն որի՝ «երկու երկրների միջև առկա բարեկամական հարաբերությունները պահպանելու նպատակով Ավստրալիայի իշխանությունները ժամանակին պետք է քայլեր ձեռնարկեին հակաթուրքական նախաձեռնությունները կանխելու համար», ինչը, փաստորեն, չի կատարվել:

Հավելենք, որ Նոր Հարավային Ուելսը Ավստրալիայի ամենախոշոր նահանգն է և առաջինը, որ ճանաչեց Հայոց ցեղասպանությունը (1997թ-ին):

http://www.tert.am/am/news/2013/05/08/genocides/