Պոլսո պատրիարքարանն անդրադարձել է հայկական եկեղեցու մոտ կրակոցներով միջադեպին

Պոլսո հայոց պատրիարքարանը պաշտոնական հաղորդագրություն է տարածել, որում անդրադարձել է Ստամբուլի հայկական եկեղեցու առջև հնչած կրակոցների հարցին:

Հիշեցնենք, որ կիրակի օրը պատրիարքարանի մայր եկեղեցու առջև (դեպքը կատարվել է ոչ թե պատրիարքարանի մայր եկեղեցու, այլ Ստամբուլի Գեդիքփաշա թաղամասի Սուրբ Հովհաննես հայկական եկեղեցու մոտ-Ակունքի խմբ.) դեպի օդ կրակոցներ էին արձակվել: Կրակոցների հետևանքով ոչ ոք չէր տուժել, սակայն այն խուճապ էր առաջացրել եկեղեցում հավաքված հայերի շրջանում:

Պատրիարքարանն այս կապակցությամբ նշել է. «Պատրիարքարանի կամ պատրիարքարանի եկեղեցու դեմ որևէ զինված գործողություն տեղի չի ունեցել: Մեր ստացած վերջին տվյալներով` դեպքը տեղի է ունեցել կիրակի օրը Գետիկփաշայի այն փողոցում, որտեղ հայկական եկեղեցին է: Երկու կամ երեք անձ ատրճանակներով դեպի օդ են կրակել և անցել փողոցով:

Դեռ հայտնի չէ, թե արդյոք այս դեպքը կապ է ունեցել եկեղեցու հետ, թե ոչ: Անհրաժեշտ հետաքննությունն իրավապահներն արդեն սկսել են, աշխատանքները շարունակվում են»,-նշվել է Պոլսո պատրիարքարանի հաղորդագրության մեջ:

Նշենք, որ նախօրեին տեղեկություններ տարածվեցին, թե ոստիկանները ձերբակալել են 16-ամյա մի թուրքի և 17-ամյա մի հայի. նրանք նշել են, թե այդպես փորձարկում էին իրենց նոր գնված ատրճանակները:

allTurkey.am