Թուրքիայի առեւտրի նախարար Հայաթի Յազըջըն հայտարարել է, թե Հայաստանի եւ Թուրքիայի միջեւ հարաբերությունների կարգավորումը կապված է Ղարաբաղի հակամարտության մեջ խաղաղությանն ուղղված կոնկրետ քայլեր իրականացվելու հետ։
Թուրքական Anadolu գործակալության փոխանցմամբ՝ քրդական Խաղաղություն եւ ժողովրդավարություն կուսակցության` Կարսից ընտրված պատգամավոր Մուլքիյե Բիրթանեյի՝ հայ-թուրքական հարաբերությունների կարգավորման հետ կապված գրավոր հարցադրմանն ի պատասխան, Թուրքիայի առեւտրի նախարար Հայաթի Յազըջըն գրավոր հայտարարություն է տարածել՝ նշելով, թե Թուրքիան Հայաստանի անկախությունն առաջինը ճանաչած երկրներից մեկն է։ Հայաթի Յազըջըն նշել է, թե Թուրքիան կարեւորում է Հարավային Կովկասում խաղաղությունն ու համագործակցությունը եւ այդ համատեքստում է 2009 թվականի հոկտեմբերի 10-ին Թուրքիան Հայաստանի հետ ստորագրել հարաբերությունները կարգավորող արձանագրություններ։
«Դրանով հանդերձ, մեր երկիրը պահպանում է հավատը, որ հայ-թուրքական հարաբերությունների կարգավորումը մնայուն եւ շարունակական կլինի Հարավային Կովկասում, հատկապես Ղարաբաղի հարցի կարգավորմանն ուղղված կոնկրետ քայլեր իրականացվելու դեպքում»,-ասել է Թուրքիայի առեւտրի նախարարը՝ շեշտելով, թե Թուրքիան Ղարաբաղի հարցում մշտապես աջակցել է Ադրբեջանի տարածքային ամբողջականության սկզբունքին։
Թուրք նախարարը նշել է նաեւ, թե 2013 թվականի առաջին երեք ամիսներին Թուրքիայի եւ Հայաստանի միջեւ ապրանքաշրջանառությունը կազմել է 29 հազար 859 դոլար։
Leave a Reply