Զինված հարձակում` Պոլսո հայոց պատրիարքարանի մայր եկեղեցու վրա

Այսօր առավոտյան զինված հարձակում է եղել Պոլսո հայոց պատրիարքարանի` Գում Գափու թաղամասում գտնվող մայր եկեղեցու վրա: Հարձակումն իրականացվել է առավոտյան պատարագի ժամանակ:

Ինչպես հաղորդում է Akunq.net-ը` հղում անելով թուրքական «Ռադիկալ» պարբերականին, այս առավոտ` ժամը 12:30-ի կողմերը, անհայտ մի անձ պատարագի ժամանակ 7 անգամ օդ կրակելուց հետո փախել է դեպքի վայրից:

Ինչպես «Ռադիկալին» հայտնել է դեպքի ականատես` պոլսահայ համայնքի ճանաչված ներկայացուցիչ Կարո Պայլանը, կիրակնօրյա պատարագի ավարտին եկեղեցուն մոտեցած մի անձ օդ կրակելուց հետո ճողոպրել է դեպքի վայրից: Խուճապ է սկսվել պատարագին մասնակցող պոլսահայերի շրջանում, որոնց մեջ եղել են նաև երեխաներ: Հարձակման հետևանքով, բարեբախտաբար, որևէ մեկը չի տուժել:

Պայլանը մասնավորապես նշել է. «Մի անձ ժամը 12:30-ի կողմերում մոտենում է պատրիարքարանի դռանը և ատրճանակով 7 անգամ օդ կրակում: Ներկա պահին փորձում են կազմել նրա ֆոտոռոբոտը: Ահաբեկչության դեմ պայքարի և անվտանգության մասնաճյուղերը միասին են աշխատում` դեպքը հետաքննելու համար: Հնարավոր է նաև, որ տվյալ անձը մենակ չի եղել: Դռան մոտ ոչ ոք չի գտնվել` մեզնից բացի: Հարձակվողը որևէ բան չի բղավել և ոչ մի կարգախոս չի հնչեցրել: Եկեղեցու ներսում խուճապ է սկսվում: Դռները փակում են և միջոցներ ձեռնարկում»:

Աղբյուրի փոխանցմամբ` հարձակումից հետո մեծ թվով ոստիկաններ են դեպքի վայր ժամանել:

Հիշեցնենք, որ բոլորովին վերջերս` սույն թվականի ապրիլի 27-ին, 30-40 հոգանոց մի խումբ ցերեկվա ժամերին հարձակվել էր Աթաշեհիրի Նոր հույս եկեղեցու վրա: Եվս մեկ հարձակում էլ եղել էր Բուրգազ կղզում գտնվող Այոիս Իոնիս հույն ուղղափառ եկեղեցու վրա:

Akunq.net