Թուրքիայում ապրիլի 30-ից ընթերցողների դատին է հանձնվել հայալեզու «Լույս» երկշաբաթաթերթը։
Թուրքական «Դողան» գործակալության փոխանցմամբ՝ ապրիլի 29-ին, Ստամբուլի Istanbul WOW հյուրանոցում տեղի է ունեցել «Լույս» երկշաբաթաթերթի շնորհանդեսը, իսկ ապրիլի 30-ից այն արդեն հասանելի է եղել ընթերցողներին։
Ավելի վաղ, թուրքական Taraf-ի հետ զրույցում «Լույս»-ի գլխավոր խմբագիր Շահնուր Քազանջըն հայտնել էր, որ նոր երկշաբաթաթերթը ուշադրության կենտրոնում է պահելու Թուրքիայի հայկական, ասորական եւ հունական համայնքներում տեղի ունեցող իրադարձություններն ու զարգացումները՝ չանտեսելով նաեւ մյուս ազգային եւ կրոնական փոքրամասնություններին։
«Մեր նոր թերթը լույս է տեսնելու 15 օրը մեկ եւ ունենալու է 28 էջ, որոնցից մեկը կլինի հայերենով։ Մենք ունենք բաժանորդագրության համակարգ, սակայն երկշաբաթաթերթը վաճառքում կլինի նաեւ կրպակներում։ Այս պահին արդեն 800 բաժանորդ ունենք»,-ասել է «Լույս»-ի գլխավոր խմբագիրը։
Leave a Reply