Թուրքիայի Մարդու իրավունքների գրասենյակի Սիիրթ (Սղերդ-Ակունքի խմբ.) քաղաքի մասնաճյուղն ուսումնասիրել է Էրուհ բնակավայրում հայկական եկեղեցու և գերեզմանատան ավերման դեպքը և արձանագրել, որ տեղի պատմական Սուրբ Հովհաննես եկեղեցին վերածել են աղջիկների մանկատան, հայտնում է «Դեմոկրատ հաբեր»-ը։
«Սա հայ ժողովրդի հավատքի և կենսակերպի դեմ իրականացված բռնաբարություն է։ Պատասխանատուների դեմ պետք է արդար հետաքննություն սկսվի»,-ասել են գրասենյակի ներկայացուցիչները։
Մարդու իրավունքների գրասենյակի պատրաստած զեկույցը երեկ ներկայացվել է մամուլի ասուլիսի ընթացքում։
Ասուլիսի ընթացքում գրասենյակի ղեկավարներից Սերդար Բաթուրը լուսանկարներ է ցուցադրել և նշել, որ խաչի պատկերով, հայերեն գրերով պատմական քարերն օգտագործվել են նոր շինության կառուցման ընթացքում։
Նա նշել է, որ Էրուհում մուսուլմանացված շատ մարդիկ դեռ այցելում են այդ եկեղեցին, ապրիլի սկզբին կանայք այնտեղ ճաշ են պատրաստում և բաժանում, սակայն չնայած դրանց՝ այլ կրոնի ներկայացուցիչների պաշտամունքի վայրում այլ շինություն կառուցելը պատմությունը ոչնչացնել է նշանակում։
«Էրուհ-Սիիրթ ճանապարհի վերակառուցման աշխատանքների ընթացքում տարածքի հայ ժողովրդին պատկանող գերեզմաններն ավերվել են։ Տարբեր մեքենաներով ճանապարհներ փորելու ընթացքում մոտ 100 գերեզման է բացվել։ Մարդկային ոսկորները տարածվել էին շրջակայքում, և գյուղի բնակիչները, հավաքելով դրանք, դարձյալ իրենց տեղերում վերաթաղել էին։ Այդ գերեզմանի հետ կապված՝ պաշտոնյաները ոչինչ չարեցին»,-ասել է Մարդու իրավունքների գրասենյակի անդամներից Զանա Աքսուն։
Աքսուն նշել է, որ այդ եկեղեցին, որը փորձում են ավերել, շատ կարևոր պատմական նշանակություն ունի հայ ժողովրդի համար։
«Այստեղ այժմ տեղի ունեցողը հայերին պատկանող հետքերը ջնջելու փորձեր են։ Պետք է մեկ վայրկյան առաջ այդ աշխատանքները դադարեցվեն։ Ղուրանի դասերի կամ մանկատան համար նախատեսված այդ շինությունը պետք է կառուցվի այլ վայրում։ Այդ նոր շինությունը հին, պահպանման կարիք ունեցող շինության տեղը կառուցելը հետին միտք ունենալ է նշանակում։ Դա հայ ժողովրդի հավատքի և կենսակերպի դեմ ուղղված բռնաբարություն է։ Այդ հին կառույցները պետք է պահպանության տակ առնվեն, վերակառուցվեն և բացվեն զբոսաշրջության համար»,-ասել է նա։
Leave a Reply