Հարցազրույց Հայոց ցեղասպանության թեմայով ֆիլմի հեղինակ` դերասան և բեմադրիչ Կարեն Մկրտչյանի հետ

Ինչո՞վ էր պայմանավորված Հայոց ցեղասպանության թեմայով ֆիլմ ստեղծելու Ձեր որոշումը:

Յուրաքանչյուր հայ յուրովի է արտահայտում իր ցավն  ու  բողոքը: Ես՝ որպես դերասան և ռեժիսոր, «Զնգը-զնգը» ֆիլմի միջոցով փորձեցի բարձրաձայնել իմ վշտի և ցասման մասին, իսկ ֆիլմում հնչող եկեղեցու  գմբեթի  զանգը  հենց անարդարության ձայնն է, զանգ, որ անընդհատ հնչելու և հիշեցնելու է հայոց ցավի մասին:

Ինչի՞ մասին է ֆիլմը: Ովքե՞ր են նկարահանվել ֆիլմում:

Ֆիլմը խաղաղ և ստեղծագործ հայերի մասին է, մի ժողովրդի, ով եկեղեցի է կառուցում, կերտում իր ազգային մշակույթը, պահպանում իր լեզուն, նվաճում անհնարինը: Եվ թե ինչպես է կերտող ու արարող հայ քրիստոնյան դառնում մահմեդական թուրքի զոհը: Եվ վերջապես ֆիլմը փյունիկի պես մոխիրներից վեր հառնող, վերստեղծող և ապրեցնող հայի մասին է, ով գիտի հարատևելու գաղտնիքը:

Ֆիլմում  նկարահանվել են իմ երեք որդիները՝ Ակիմը, Արմանը  և Գարիկը, ինչպես նաև` նրանք, ովքեր կիսում են մեր ժողովրդին բաժին հասած անասելի ողբերգությունը և իրենց դերակատարությամբ ու ապրած կյանքով արժանի են հայ լինելու պատվին՝ Լեռնիկ  Հարությունյան, Անուշ Ափյան, Անահիտ  Պարսանյան, Մարիա  Աբելյան, Բարխուդար  Մանջոյան, Արման  Մկրտչյան, Ահարոն  Հարությունյան:

Ինչո՞ւ որոշեցիք  ֆիլմն առաջին անգամ ցուցադրել Ստամբուլում:

Ֆիլմը բողոք է հենց Թուրքիայի և թուրքերի դեմ, ովքեր շարունակաբար ժխտում են Հայոց ցեղասպանության փաստը: Նպատակս մեկն էր և հստակ՝ ցուցադրել այն հենց Թուրքիայում` Ստամբուլում, հերթական անգամ իրենց պատմությունն ու վարած քաղաքականությունը վերանայելու հորդորով:

Ինչպե՞ս արձագանքեց հանդիսատեսը:

Հանդիսատեսի  մեծ  մասը  թուրքեր և  քրդեր էին: Ֆիլմը  դիտեցին  քար  լռությամբ  և  վերջում  հոտնկայս  ծափահարեցին:

Ի՞նչ ծրագրեր և նախաձեռնություններ ունեք:

Մյուս  տարի՝  ապրիլի 24-ին,  ծրագրել  եմ  բեմադրել  բացօթյա  ներկայացում  Ծիծեռնակաբերդի  հուշահամալիրում: Այն նախնական մշակման փուլում է, որը մեծ ու ժամանակատար նախագիծ է, հետևաբար կիրագործվի համախոհներիս և բոլոր նրանց շնորհիվ, ովքեր պատրաստակամություն կհայտնեն օգնել: Այսօրինակ ծրագրերը, ինչպես նաև «Զնգը զնգը» ֆիլմը առևտրային նպատակներ չեն հետապնդում:

Երախտիքի Ձեր խոսքը

Շնորհակալ եմ Արթուր Գրիգորյանին և Երգի  պետական  թատրոնի տաղանդավոր երգիչներին, ովքեր փայլուն կատարեցին ֆիլմում հնչող Կոմիտասի ստեղծագործությունները, Հրաչ  Քեշիշյանին  և  «Արմենիա»  հեռուստաընկերությանը աջակցության և պատրաստակամության համար: Շնորհակալ եմ Բագրատ  Նավոյանին` Ստամբուլ մեկնելու համար հատկացված  ինքնաթիռի  տոմսերի, Հասմիկ  Աբրահամյանին՝ հագուստի ձևավորման և պատրաստման համար, Արմեն  Խոջոյանին՝  տրամադրած  սրբապատկերների համար,  Մարիամ  Մաթոսյանին՝ երգի, ինչպես նաև՝ «Ակօս»  թերթի  խմբագրության  աշխատակիցներին:

Ձեր բարեմաղթանքը

Մեկ գավաթ բարություն՝  աշխարհիս  բոլոր  մարդկանց: Բարին կամեցեք և սիրեք միմյանց:

Ֆիլմը ցուցադրված է նաև Youtube-ում` http://www.youtube.com/watch?v=47TsrfzywgA

Հարցազրույցը վարեց Թեհմինե Մարտոյանը

Akunq.net