Դերսիմում առաջին անգամ Հայոց ցեղասպանության զոհերի հիշատակն են հարգել

Թուրքիայում Հայոց ցեղասպանության զոհերի հիշատակման միջոցառումներն այս տարի ընդգրկեցին նաեւ Դերսիմը (Թունջելի)։

Թուրքական CNNturk-ի փոխանցմամբ՝  ապրիլի 24-ին Թունջելիի Հանրապետության հրապարակում Դերսիմի հայերի միության կողմից կազմակերպվել է Հայոց ցեղասպանության 98-րդ տարելիցին նվիրված միջոցառում, որի ժամանակ միության ղեկավարներից Սերքան Սարըթաշը ելույթով է հանդես եկել։ Նա նշել է, որ Դերսիմում իրենց մանկությունն անցել է Դերսիմի բնիկ ժողովուրդների՝ հայերի եւ ալեւիների ցեղասպանության մասին պատմություններ լսելով։

Հայոց ցեղասպանության հիշատակման օրը Դերսիմի կենտրոնում գտնվող փաստաբանական գրասենյակի վրա սեւ ժապավեն է կախված եղել։ Գրասենյակի փաստաբաններից Ինան Յըլմազը հայտնել է, որ ապրիլի 24-ը Հայոց ցեղասանության տարելիցն է, դրա համար էլ պատուհաններից սեւ ժապավեն են կախել։

Նշենք, որ Թուրքիայում Հայոց ցեղասպանության զոհերի հիշատակման արարողություններ են տեղի ունեցել մի շարք քաղաքներում, այդ թվում Ստամբուլում, Անկարայում, Իզմիրում, Մալաթիայում, Ադանայում, Բոդրումում եւ Դիարբեքիրում։

http://news.am/arm/news/150651.html