«Ակունքի» խմբագրատանը հանդիպում` Միություն ընդդեմ ցեղասպանության կազմակերպության անդամ Սելայ Էրթեմի հետ

Երեկ` ապրիլի 25-ին, ժամը 17:00-ին Արևմտահայոց հարցերի ուսումնասիրության կենտրոնը հանդիպում կազմակերպեց Գերմանիայում գործող Միություն ընդդեմ ցեղասպանության կազմակերպության անդամ Սելայ Էրթեմի հետ: Բանախոսին ներկայացրեց կենտրոնի տնօրեն Հայկազուն Ալվրցյանը:

Սելայ Էրթեմը հանդիպման սկզբում մասնակիցներին համառոտ ներկայացրեց իրենց կազմակերպության գործունեությունը, այնուհետև պատասխանեց ներկաների հարցերին: Նա մասնավորապես նշեց, որ հիմնականում գերմանաբնակ թուրքերից և քրդերից կազմված Միություն ընդդեմ ցեղասպանության կազմակերպությունը հիմնվել է 1998 թ.` Ֆրանկֆուրտ քաղաքում: Կազմակերպությունը 1999 թ. սկսած` ավանդաբար ամեն տարվա ապրիլի 24-ին պատվիրակություն կամ  որևէ անդամի ուղարկում է Երևան` հարգանքի տուրք մատուցելու Հայոց ցեղասպանության անմեղ նահատակների հիշատակին: Սելայ Էրթեմը նաև ներկաների հայտնեց, որ 1999 թ. իրենց միությունը Հայոց ցեղասպանության ճանաչման պահանջով ստորագրահավաք էր կազմակերպել, որին մասնակցել էին 10 հազարից ավել թուրքեր և քրդեր, և այդ ստորագրություններն ուղարկել էին Թուրքիայի ազգային մեծ ժողով: Վերջինս անգամ հարկ էլ չհամարելով փաթեթը բացել` հետ էր ուղարկել այն: Տիկին Էրթեմը հանդիպման մասնակիցներին նաև հաղորդեց, որ Միություն ընդդեմ ցեղասպանության կազմակերպությունը յուրաքանչյուր տարվա ապրիլի 24-ին խորհրդանշական փոխհատուցում է վճարում Մեծ եղեռնի համար` փոքրիկ դրամական աջակցություն հատկացնելով Հայոց ցեղասպանության թանգարան-ինստիտուտին: 

Հանդիպմանը մասնակցում էր նաև Մարդու իրավունքների կազմակերպության Ստամբուլի մասնաճյուղի անդամ Հրանտ Գասպարյանը: Հանդիպման վերջում նա ևս մի շարք տեղեկություններ հաղորդեց իր ներկայացրած կազմակերպության հայանպաստ գործունեության շուրջ:

Akunq.net