Իզմիրում Հայոց ցեղասպանության ոգեկոչման միջոցառման ժամանակ ծեծկռտուք է տեղի ունեցել

Թուրքիայում Հայոց ցեղասպանության զոհերի ոգեկոչման միջոցառումները երեկ առանց միջադեպերի չեն անցել։

Ինչպես տեղեկացնում է Haber7 կայքը, Իզմիր (Զմյուռնիա) քաղաքում Ցեղասպանության հարցում տարբեր տեսակետներ ունեցող խմբերի միջև ծեծկռտուք է տեղի ունեցել։
Ոստիկանությունը կարողացել է հանդարտեցնել կողմերին։
Հայոց ցեղասպանությունը ժխտող 30 հոգանոց խմբի անունից ելույթ է ունեցել «Ժողովրդի փրկություն» կուսակցության տարածքային բաժնի ղեկավար Թաջեթթին Չոլաքը։ Նա հայտարարել է, որ Ցեղասպանություն չի եղել, և դա ԱՄՆ-ի հորինած սուտն է։
Նույն տարածքում հավաքված 150 հոգանոց խմբի անունից ելույթ է ունեցել Զեյնեփ Թոզդումանը և նշել, որ Հայոց ցեղասպանություն տեղի է ունեցել։

Երկու խմբերը միմյանց հասցեին վիրավորական արտահայտություններ են հնչեցրել, ինչից հետո ծեծկռտուք է սկսվել՝ բռունցքների և դրոշների փայտերի գործադրմամբ։

Ոստիկանության միջամտությունից հետո խմբերը հեռացել են հրապարակից։

http://tert.am/am/news/2013/04/25/izmir/