Ստամբուլում ոգեկոչել են Հայոց ցեղասպանության զոհերի հիշատակը

Ստամբուլի Թաքսիմ հրապարակում երեկ միջոցառում է տեղի ունեցել՝ նվիրված Հայոց ցեղասպանության 98-ամյա տարելիցին։ Ինչպես տեղեկացնում է «Ակօս» թերթը, հիշատակի միջոցառման մասնակիցները մոմավառություն են կազմակերպել և մեխակներ թողել։
1915թ. ապրիլի 24-ին Պոլսում ձերբակալվելով աքսորի ճանապարհներին սպանված հայ մտավորականների նկարներով ցուցապաստառներ են բացվել, ընթերցվել են նրանց հուշերը։

Միջոցառմանը մասնակցել են հարյուրավոր մարդիկ, այդ թվում՝ Թուրքիայում ճանաչված լրագրողներ։ Ելույթ է ունեցել Թուրք բժիշկների միության նախկին նախագահ Գենջայ Գյուրսոյը, ով նշել է, որ 1915թ. ապրիլի 24-ին իրականացված ձերբակալությունների թիրախում հայ ժողովրդի «ուղեղն» էր։

«Ապրիլի 24-ը Հայոց ցեղասպանության սկիզբն է համարվում։ Հարյուր հազարավոր հայեր, թողնելով իրենց տունն ու տեղը, աշխատանքը, ունեցվածքը, բռնությամբ անապատներ ուղարկվեցին։ Ճանապարհներին սպանվեցին։

Ընտանիքները կիսվեցին, երեխաներն առանց ծնողների մեծացան, ծնողներն առանց երեխաներ մնացին և այլևս իրար չգտան։ Տասնյակ հազարավորները մահացան հիվանդություններից, սովից»,- ասել է նա։
Գյուրսոյը նաև նշել է, որ տարիներ շարունակ փորձ է արվել ջնջել ոչ միայն հայերին, այլև նրանց մշակույթը՝ թուրքերի հիշողությունից, սակայն ճնշելով խղճի ու արդարության զգացումը կուրացնել չեն կարողացել, և իրենք այսօր կիսում են Ցեղասպանության վիշտն ու ցավը։

http://tert.am/am/news/2013/04/25/taksim-genocide/