Թուրք հայտնի պատմաբան Սայիթ Չեթինօղլուի հետ հանդիպում` Արևմտահայոց հարցերի ուսումնասիրության կենտրոնում

Արևմտահայոց հարցերի ուսումնասիրության կենտրոնը ապրիլի 29-ին, ժամը 14:00-ին հանդիպում է կազմակերպում Հայոց ցեղասպանության փաստն ընդունող թուրք հայտնի պատմաբան, մարդու իրավունքների պաշտպան Սայիթ Չեթինօղլուի հետ:

Սայիթ Չեթինօղլուն ծնվել է Տրապիզոնում: Չեթինօղլուն մարդու իրավունքների պաշտպանության ուղղությամբ աշխատանքներ է տանում Օզգյուր համալսարանում, Մարդու իրավունքների կազմակերպությունում, որտեղ գրավել է նաև ղեկավար պաշտոն, ինչպես նաև` Անկարայի` «Մտքին ազատություն» նախաձեռնությունում:  Մարդու իրավունքների վերաբերյալ տեսական հրապարակումներ տպագրող «Ինսան հաքլարը յազըլարը» և «Ումանիտե» հանդեսների խմբագիրը լինելուց բացի, կատարում է նաև «Բելգե» և «Փերի» հրատարակչատների` Թուրքիայի ազգային փոքրամասնությունների վերաբերյալ գրքերի խմբագրական գործը:

Նրա հեղինակությամբ են լույս ընծայվել «Բելգե» հրատարակչատան կողմից տպագրված` «Ունեցվածքի հարկը. 1942-1944 թթ.: Տնտեսական և մշակութային ցեղասպանություն» վերնագրով աշխատությունը, «Փերի» հրատարակչատան կողմից տպագրված` «Զավեն պատրիարքի` մարդասպանների ցանկը. բնաջնջողները և առաքինի մահմեդականները» ուսումնասիրությունը: Չեթինօղլուն Ֆիքրեթ Բաշքայայի հետ միասին Օզգյուր համալսարանի հրատարակչության միջոցով լույս է ընծայել նաև «Իթթիհադականությունից դեպի քեմալիզմ. փոքրամասնությունները Թուրքիայում» գիրքը, իսկ Ռագըփ Զարաքօլուի և Թեոֆանիս Մալքիդիսի հետ մեկտեղ գրել է «Հունական ցեղասպանությունը. զանգվածային ոճրագործություն Պոնտոսում» աշխատությունը: Նա նաև մի քանի այլ գրքերի համահեղինակ է:

Սայիթ Չեթինօղլուն ներկայում աշխատում է «Թուրք բուրժուազիան և թուրքական ունեցվածքի գաղտնի կողմը» գրքի վրա, որը նվիրված է հունական և հայկական գույքը զավթած թուրք-մուսուլմանական հարստության թեմային: Չեթինօղլուի` Միություն և առաջադիմություն կուսակցության, քեմալիստական ռեժիմի բնույթի, Հայոց ցեղասպանության, Պոնտոսի ցեղասպանության, ասորիների ցեղասպանության և այլ թեմաների վերաբերյալ հոդվածները տպագրվել են թուրքական և արտասահմանյան մի շարք հեղինակավոր պարբերականներում:

Մուտքն ազատ է. հրավիրում ենք բոլոր ցանկացողներին:

Հասցե` ք. Երևան, Գյուլբենկյան 38, 5-րդ հարկ, Արևմտահայոց հարցերի ուսումնասիրության կենտրոն:

Akunq.net