Օսմանյան «զտման» չավարտված քայլերն իր ավարտին է հասցնում քեմալիստական Թուրքիան. Աքթար

Հայտնի թուրք լրագրող, «Թարաֆ» թերթի սյունակագիր Ջենգիզ Աքթարն անդրադարձ է կատարել Հայոց ցեղասպանությանը:

«Ապրիլի 24-ին ի՞նչ է» վերտառությամբ հոդվածում Աքթարը ներկայացրել է Հայոց ցեղասպանությունն ու կոչ արել ապրիլի 24-ին մասնակցել Թուրքիայի մի քանի քաղաքներում կազմակերպվելիք միջոցառումներին, որտեղ հարգելու են Ցեղասպանության զոհերի հիշատակը:

«Հիշեցնեմ, որ Միություն և առաջադիմություն կուսակցության իշխանության տարիներին Օսմանյան կայսրության` իր հայ քաղաքացիներին արմատախիլ անելու որոշումը կյանքի կոչելու սև օրն է: Վաղը 98-րդ տարելիցն է:

Այս որոշման վերաբերյալ հարուստ տեղեկություններ և աշխատանքներ չկան: Օրինակ, մեր օրերում համար մեկը համարվող քրդական խնդրում քրդերի անկարգությունների և հայերին այդ տարածքներից ոչնչացնելու կապի վերաբերյալ աշխատանքներ չկան: Հայերին ոչնչացնելուց հետո Փոքր Ասիայի բարգավաճումն ինչու՞ է այս վիճակին հասել (վատ վիճակ-խմբ.), տեղեկություն չկա:

Մեր իմացածը միայն մարդկային և գույքային կորուստների մասին տեղեկություներն են:

Հիշեցնեմ, որ 1918 թվականի հոկտեմբերին «իթթիհադականների» փոխարեն իշխանության եկած օսմանյան նոր կառավարության համապատասխան հանձնաժողովի` 1919 թվականին մայիսին հրապարակած թվերի համաձայն` 800 հազար հայ է զոհվել: 1928 թվականին Գլխավոր շտաբի հրապարակած տվյալներով` 800 հազար հայ և 200 հազար հույն է մահացել:

1918 թվականի սովամահության, հիվանդությունների և կոտորածների պատճառով զոհերի թիվն անցնում է մեկ միլիոնը: Սա Թաներ Աքչամի` ապրիլի 21-ին «Զամանում» լույս տեսած հոդվածի տվյալներն են:

Օսմանյան կայսրության կողմից «զտման» չվերջացած քայլերն իր ավարտին է հասնում քեմալիստական Թուրքիան: Թուրքիան վերացնում է Փոքր Ասիայում հայերի նյութական հետքերն ու ժառանգություն»,-նշում է հեղինակն ու անդրադառնում Թուրքիայի կողմից 2015 թվականին ընդառաջ արվող քայլերին:

«Թուրքական ժխտողականությունը 2015 թվականից առաջ երկու հիմնական գործընթացներով է առաջ գնում:
Առաջինը գիտական ուղղությունն է: Թուրքական կողմը փորձում է «հակառակ թեզն» առաջ տանել` դրա համար թիրախ ընտրելով ԱՄՆ-ի գիտական կառույցները, իսկ վերջին շրջանում անցնելով արդեն Եվրոպա:

Օրինակ, «թուրքերի բարեկամներ» 4 եվրոպացի ակադեմիկոսները Լոնդոնի տնտեսագիտական դպրոցում ժխտողական քննարկումներ ունեցան: Թուրքիան արդեն արտասահմանցիների բերանով է ժխտողականություն տարածում:

Հաջորդն էլ Ադրբեջանի աջակցությամբ հանրության հետ աշխատանքներն են: Հատկապես ԱՄՆ-ում գործող լոբբիստական ընկերությունների միջոցով են իրականացվում այդ աշխատանքները: Ադրբեջանը մշտապես հիշատակվում է, երբ խոսում ես ժխտողական աշխատանքների մասին….

Հույսը ժխտողականությունը մերժող և ցեղասպանությունը հիշողություն չջնջող հասարակության մի հատվածն է: Սրա մեջ ներառվում է նաև Փոքր Ասիայում ապրած հայերի «բանավոր» հիշողությունը:

Այս տարի Ադանայում, Անկարայում, Սասունում, Բոդրումում, Դերսիմում, Դիարբեքիրում, Ստամբուլում և Իզմիրում հիշատակի միջոցառում է անցկացվելու: Հանուն արդարության»:

Թարգմանությունը` «Թուրքագիտական պորտալի»

allTurkey.am