Ցեղասպանության ճանաչման փուլը կարելի է համարել անցած. ժամանակն է բարձրացնելու հատուցման հարցը

ՀՅԴ Բյուրոյի Հայ դատի եւ քաղաքական հարցերի գրասենյակի ղեկավար Կիրո Մանոյանի դիտարկմամբ` Ցեղասպանության ճանաչման փուլը կարելի է համարել անցած, և ժամանակն է բարձրացնելու մեր իրավունքների և հատուցման հարցը, որը ենթադրում է 3 հստակ պահանջ`

1. տարածքային` հիմնված Վուդրո Վիլսոնի իրավարար վճռի վրա

2. Հայ առաքելական եկեղեցուն պատկանող ունեցվածքի

3. Ցեղասպանության զոհերի ժառանգների նյութական փոխհատուցման:

Ներկա դրությամբ Դաշնակցության պատվերով հայ և օտար ազգի մասնագետները փաստագրաիրավական նախագիծ են պատրաստում, որում ներառված են հիշյալ պահանջներն ու դրանց բավարարմանը հասնելու իրավական հիմքերը: Հայոց ցեղասպանության 100-ամյա տարելիցի առիթով ստեղծված պետական հանձնաժողովի առաքելությունը ևս պետք է լինի պահանջատիրության ուղենիշների փաստաթղթային հստակեցումն ու առաջադրումը, որպեսզի գործը չավարտվի միայն արարողակարգային միջոցառումներով, այլ` դրվի սկիզբը հատուցման գործընթացի:

«Տարածքային պահանջի կամ փոխհատուցման գործընթացի մեկնարկը չպետք է ձգձգել, քանի որ արդեն սկսել է միջազգային շրջանակներում ակտիվանալ այն տեսակետը, թե Թուրքիան կարող է ներողություն խնդրել, բայց այսօրվա Թուրքիան պարտավոր չէ Օսմանյան Թուրքիայի արածը փոխհատուցել կամ վճարել»,- ընդգծեց Կիրո Մանոյանը:

HayNews.am-ի հարցին` կան տեսակետներ, ըստ որոնց՝ տարածքների վերադարձման հարց առաջ քաշելով՝ մենք քրդերի հետ ենք բախումներ ունենալու, քանի որ դե ֆակտո հայկական տարածքները քրդերի հսկողության տակ է, ՀՅԴ Բյուրոյի Հայ դատի եւ քաղաքական հարցերի գրասենյակի ղեկավարը նկատեց. «Այո, որ խնդիր կարող ենք ունենալ փաստ է, բայց դա չպետք է ստիպի մեզ հրաժարվել մեր իրավունքից: Մենք չպետք է ինչ-որ մանրամասնությունների մեջ ընկնենք, այլ` ամրագրենք վիլսոնյան սահմանները և տեր կանգնենք մեր իրավունքներին»:

Անդրադառնալով Ցեղասպանության 100-ամյա տարելիցին ընդառաջ Թուրքիայից սպասելիք քայլերին և հայ-թուրքական արձանագրությունների ճակատագրին՝ Կիրո Մանոյանը ևս մեկ վտանգի մասին նախազգուշացրեց: Այն է` հիմք ընդունելով հայկական կողմի տեսակետը, թե թող իրենք վավերացնեն, մենք կվավերացնենք հայտարարությունը, Թուրքիան կարող է վավերացնել արձանագրություններից մեկը, որը գործածության ժամկետ չի պարունակում և մեզ գցել անհարմար վիճակի մեջ, ուստի անհրաժեշտ է կամ հետ վերցնել ստորագրությունը կամ վավերացնել արձանագրությունը` ՍԴ-ի վերապահումներով հանդերձ:

«Ավելին` մեր ցանկությունն է, որպեսզի ստորագրությունը հետ վերցվի և մշակվի կես էջանոց փաստաթուղթ, որտեղ հստակ պահանջ կդրվի ցամաքային շրջափակումը վերացնելու, միջազգային իրավունքների համաձայն հարաբերությունները կարգավորելու: Մեր այս պահանջները մենք ասել ենք նաև ՀՀ նախագահին` ընտրություններից առաջ, սակայն նա մերժեց, որովհետև համոզված է, թե ներկա արձանագրությունները շատ լավն են: Չգիտեմ` իրականում նրանք իմ նշած վտանգներն ընկալում են կամ հասկանում, բայց գործնականում ես չեմ տեսնում, որ հասկանում են դրանց հնարավորությունը»,- HayNews.am-ի հետ զրույցում նշեց Կիրո Մանոյանը:

http://haynews.am/hy/1366721010