Արևմտահայոց հարցերի ուսումնասիրության կենտրոնում հանդիպում` Միություն ընդդեմ Ցեղասպանության կազմակերպության անդամ Սելայ Էրթեմի հետ

Ապրիլի 25-ին, ժամը 17:00-ին Արևմտահայոց հարցերի ուսումնասիրության կենտրոնը հանդիպում է կազմակերպում Գերմանիայի Ֆրանկֆուրտ քաղաքում գործող Միություն ընդդեմ Ցեղասպանության (Soykırım Karşıtları Derneği /SKD/-բառացի` Ցեղասպանությանն ըդդիմացողների միություն) կազմակերպության անդամ Սելայ Էրթեմի հետ:

1998 թ. սեպտեմբերի 26-ին Ֆրանկֆուրտում բնակվող թուրքերի և քրդերի կողմից ստեղծված սույն կազմակերպությունն իր գործունեության հիմնական նպատակն է դարձրել` պայքար մղել Թուրքիայում իրագործված հայերի, պոնտոսցի հույների և ասորիների ցեղասպանությունների ճանաչման և դրանց հետևանքների վերացման համար:

Միությունն ունի նաև մի անխախտ ավանդույթ. 1999 թ. սկսած յուրաքանչյուր տարի` ապրիլի 24-ին, կազմակերպության նախագահը (Ալի Էրթեմ) կամ անդամներից որևէ մեկը պարտադիր այցելում է Երևան և միության անունից հարգանքի տուրք մատուցում Մեծ եղեռնի անմեղ նահատակների հիշատակին` Հայոց ցեղասպանության հուշարձան տանելով ծաղիկներ և ծաղկեպսակ: Այս տարի միության առաքելությունը կիրագործի Սելայ Էրթեմը, ով Երևանում կգտնվի ապրիլի 22-ից 26-ը և կմասնակցի նաև ապրիլի 23-ին Հայոց ցեղասպանության թանգարանի նախասրահում տեղի ունենալիք գրքերի շնորհանդեսին և նույն օրը նախատեսվող  ջահերով երթին:

Ապրիլի 25-ին Արևմտահայոց հարցերի ուսումնասիրության կենտրոնում նախատեսվող հանդիպման ժամանակ Սելայ Էրթեմը կներկայացնի միության գործունեությունը և կպատասխանի մասնակիցներին հետաքրքրող հարցերին:

Սիրով հրավիրում ենք բոլոր ցանկացողներին:

Հասցեն` ք. Երևան, Գյուլբենկյան 38, 5-րդ հարկ:

Akunq.net