Պոեզիայի միջազգային փառատոնի մասնակիցները Էջմիածնում և Ծիծեռնակաբերդում

Մայր Աթոռի տեղեկատվական համակարգից տեղեկացնում են, որ Պոեզիայի առաջին միջազգային փառատոնի մասնակիցներին Մայր Աթոռ Սուրբ Էջմիածնում` «Վաչե և Թամար Մանուկյան» մատենադարանում, ընդունել է Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց կաթողիկոս Գարեգին Բ-ն: Ողջունելով փառատոնի մասնակիցների այցը համայն հայության հոգևոր կենտրոն` Վեհափառ Հայրապետն իր օրհնությունն ու բարեմաղթանքներն է բերել ներկաներին: Նորին Սրբությունն իր գնահատանքն է հայտնել Հայաստանի գրողների միության նախագահին` Երևանում Պոեզիայի միջազգային առաջին փառատոնի կազմակերպման, ինչպես նաև փառատոնը հայոց նվիրական սրբավայր այցելությամբ սկսելու համար: Վեհափառ Հայրապետն իր խոսքում անդրադառնալով պոեզիայի բարձր կոչմանը` հորդորել է պոեզիայի մշակներին իրենց աստվածաշնորհ կարողություններն ի բարին ծառայեցնել` մարդկության բարօրության, ժողովուրդների միջև բարեկամության կերտման համար: Հանդիպման վերջում Ամենայն Հայոց Կաթողիկոսը պատասխանել է տարբեր երկրներից ժամանած գրողներին հետաքրքրող հարցերին:

Պոեզիայի միջազգային փառատոնի մասնակիցներն ապրիլի 17-ին այցելեցին Ծիծեռնակաբերդի հուշահամալիր: «Հայաստան ժամանած օտարերկրացիների համար Ծիծեռնակաբերդի հուշահամալիր այցելելը յուրօրինակ խորհուրդ ունի, և միտված է նաև Հայոց ցեղասպանության ճանաչման միջազգայնացմանը»,- ասել է Հայաստանի գրողների միության նախագահ Լևոն Անանյանը: Նրա խոսքով` տարիների փորձը ցույց է տալիս, որ արտասահմանից ժամանած գրողներից շատերն, այցելելով Ծիծեռնակաբերդի հուշահամալիր, հետագայում գրքեր են գրում Հայոց ցեղասպանության մասին, ինչը նպաստում է Ցեղասպանության մասին միջազգային հասարակության իրազեկվածության բարձրացմանը:

Հուշահամալիրի մոտ Կանադայից ժամանած բանաստեղծ, ցեղասպանագետ, Ալան Ուայթհորնը մասնակիցներին ներկայացրեց 1915 թվականին կատարված ոճրագործության պատմությունը: «Մենք միշտ հիշում ենք Ցեղասպանության զոհ դարձածների մասին, երբեք չենք մոռանում»,- շեշտել է Ուայթհորնը: Հայոց ցեղասպանության մասին մի քանի աշխատությունների հեղինակ Ալան Ուայթհորնի տատիկը նույնպես Եղեռնի զոհ է դարձել: Գրողը վստահ է, որ յուրաքանչյուր գիտական աշխատություն, լրագրողական անդրադարձ` Ցեղասպանության թեմային, ոճրի միջազգային ճանաչման քայլ է: Այցի վերջում արտերկրից ժամանած հյուրերը եղևնի տնկեցին Հիշողության պուրակում:

http://www.yerevan2012.org/index.php?option=com_content&view=article&id=1175:2013-04-17-12-04-01&catid=41:local-news-&Itemid=106&lang=hy