Ջոն Քերին ԼՂ հակամարտության լուծման հարցում Թուրքիային «կարևոր դերակատար» է որակել

Չնայած Թուրքիան մեծացնում է հակահայկական կողմնակալությունը` ԱՄՆ պետքարտուղար Ջոն Քերին առաջ է քաշում Լեռնային Ղարաբաղի հարցում Թուրքիայի դերի մեծացման հարցը՝  նշելով, որ Անկարան կարող է «կառուցողական դեր» խաղալ «սառեցված հակամարտության» լուծման գործում, գրում է ԱՄՆ Հայ դատի գրասենյակը` Facebook սոցիալական ցանցի իր էջում։

Թուրքական «Անադոլու» գործակալությունն իր հերթին գրում է, որ Ջոն Քերին այդ հայտարարությունն արել է ԱՄՆ Կոնգրեսի Ներկայացուցիչների պալատում՝ 2014թ. բյուջեն ներկայացնելու ընթացքում։

Քերին նշել է, որ Միջին Արևելքում խաղաղության հաստատման, Լեռնային Ղարաբաղի և Կիպրոսի հարցերում Թուրքիան «կառուցողական դերակատար է»։
Դեմոկրատ պատգամավոր Գրեգորի Մեքսը հարցուպատասխանի ընթացքում նշել է, որ Եվրոպայի և Ասիայի տնտեսական կապերը խորացնելուն զուգահեռ` չպետք է անտեսել Թուրքիայի և Ռուսաստանի նման ռազմավարական նշանակություն ունեցող երկրների հետ հարաբերությունները, և այդ մասին հարց է ուղղել Քերիին։
Քերին նշել է, որ Թուրքիայի հետ բազմաթիվ հարցերում հրաշալի համագործակցություն ունեն։
«Միջին Արևելքում խաղաղության հաստատման համար Թուրքիան կարևոր դերակատար է։ Թուրքերը Սիրիայի հարցով աջակցում են մեզ, փորձում են միավորել Սիրիայի ընդդիմադիր մեծ խմբերին՝ նախաձեռնելու են շաբաթ օրը տեղի ունենալիք հանդիպումը։ Թուրքիան սառեցված հակամարտություններում՝ Լեռնային Ղարաբաղի և Կիպրոսի հարցերում, օգնելու համար մեզ հետ հանդիպումներ է իրականացնում։ Նա այս հարցերում կառուցողական դերակատար կարող է լինել»,-ասել է ամերիկացի պաշտոնյան։

http://tert.am/am/news/2013/04/18/kerry-turkey/