Մենք 1915-ի կոտորածներից հետո խնդիր չենք լուծել ու վախենում ենք, որ չթաղված դիակները լցվեն մեզ վրա. թուրք գործիչ

Թուրք գործիչ, ազգային փոքրամասնությունների հարցերով մասնագետ, քրդական հարցի կարգավորման համար Էրդողանի կողմից «Իմաստունների հանձնաժողովում» ընդգրկված Բասքըն Օրանի` «1915-ի հայկական կոտորածներից հետո Թուրքիայում ոչ մի հարց չի լուծվել» հայտարարությունը խիստ արձագանք է գտել թուրք ազգայնականների շրջանում:

Թուրքական «Հաբերթուրք» հեռուստաընկերության «Խոսքը քոնն է» հաղորդման ժամանակ Բասքըն Օրանը կրկնել է Իզմիրում արած իր հայտարարությունը` նշելով, թե տխրեցնող է, որ պետականամետ մտածելակերպով քաղաքական գործիչ եւ կուսակցապետ Դեւլեթ Բահչելին իրեն դավաճան է անվանել:

Բասքըն Օրանը, անդրադառնալով Թուրքիայի խնդիրներին, կրկնել է օրեր առաջ Իզմիրում մի միջոցառման ժամանակ արած իր հայտարարությունը. «1915-ի հայկական կոտորածներից հետո մենք ոչ մի հարց չենք լուծել եւ բոլոր դիակները լցրել ենք դարակները: Հիմա դրանք դեպի մեզ են գալիս, եւ քանի որ մենք դիակները չենք թաղել, մենք վախենում ենք, որ չթաղված դիակները կլցվեն մեզ վրա»:

Բասքըն Օրանը պնդել է, թե պառակտիչ է, երբ թուրք ինքնությունը մյուսներից վեր է դասվում: «Երբ ասում ենք ազգային պետություն, խնդիր չկա, իսկ երբ` ազգ-պետություն` դա դառնում է Աստծո պատիժը մեր գլխին: Պետք է առաջնային լինի ոչ թե թուրք ինքնությունը, այլ թուրքիացի ինքնությունը, քանի որ երբ երկրում ապրող մյուս էթնիկ խմբերին պարտադրում ես ասիմիլիացիա, դա նրանց կողմից չի ընդունվում, եւ այն դառնում է պառակտիչ»,-ասել է Բասքըն Օրանը:

NEWS.am-ը հիշեցնում է, որ Բասքըն Օրանը 2008-ին Թուրքիայում «Ներեցեք մեզ, հայեր» ինտերնետ ստորագրահավաքի կազմակերպիչներից էր: «Ներեցեք մեզ, հայեր» ակցիային ինտերնետով միացան Թուրքիայի ավելի քան 30 հազար քաղաքացիներ։

http://news.am/arm/news/149209.html