«Իրակլի Երկրորդի միություն» ոչ կառավարական կազմակերպությունը ողջունում է բազմաթիվ ժողովրդավարական երկրների կողմից Հայոց ցեղասպանության ճանաչումը, ինչպես նաև կոչ է անում Վրաստանի կառավարությանը հետևել նրանց օրինակին։ Այս մասին է հաղորդում Regnum լրատվական գործակալությունը:
Աղբյուրի փոխանցմամբ՝ կազմակերպության ղեկավար Արչիլ Չկոիձեն հայտարարել է, որ իրենք «Հայոս-Քարթլոսից մինչև մեր օրերը» խորագրով համաժողովի ընթացքում, որը տեղի է ունենալու ապրիլի 17-ին, ևս մեկ անգամ դիմելու են Վրաստանի իշխանություններին՝ Հայոց ցեղասպանությունը ճանաչելու պահանջով։
«Համաժողովի մասնակիցները մեկ րոպե լռությամբ կհարգեն Օսմանյան կայսրությունում իրագործված հայ ժողովրդի ցեղասպանության զոհերի հիշատակը: Իրակլի Երկրորդի միությունը և Թբիլիսիի հայերի ասամբլեան մեկ անգամ ևս կառավարությանը կոչ կանեն` ճանաչել Հայոց ցեղասպանությունը, որն իր սրությամբ հավասար էր Հոլոքոստին, առավել ևս, որ այն ճանաչվել է ժողովրդավարական երկրների միության կողմից»,- ասել է Արչիլ Չկոիձեն:
Համաժողովի ընթացքում կքննարկվեն հայ-վրացական հարաբերություններն ու պատմությունը կեղծելու փորձերը, որը միտումնավոր խեղաթյուրվում է՝ երկու եղբայրական պետությունների միջև թշնամանք սերմանելու նպատակով։
http://www.armtown.com/news/am/ays/20130415/2013041548/
Leave a Reply