Ուկրաինացի փորձագետ. Թուրք ղեկավարներն ակտիվորեն հակազդում են Հայոց ցեղասպանության ճանաչման գործընթացին

Հայոց ցեղասպանության հերթական տարելիցի մոտենալը ստիպում է մտածել ոչ միայն այն մասին, թե որքան տիտանական աշխատանք են իրականացրել հայերը` աշխարհին այդ ողբերգության մասին տեղեկացնելու առումով, այլեւ այն մասին, որ տարիներ շարունակ Թուրքիայի ղեկավարությունն իր մեջ ուժ չի գտել ճանաչելու մի ողջ ժողովրդի զանգվածաբար բնաջնջելու փաստը: Այս մասին, Analitika.at.ua-ին տված մեկնաբանությունում նշել է ուկրաինացի փորձագետ, «Պոլիտիկա» միջազգային նախագծերի վերլուծական կենտրոնի համակարգող Օլեգ Սմիրնովը:

«Հատկանշական է, որ տարեցտարի աշխարհում աճում է պետությունների ու նահանգների, մարզերի ու քաղաքների թիվը, որոնք ճանաչում ու դատապարտում են 1915-ին երիտթուրքերի կատարած հանցավոր գործողությունները:

Միաժամանակ, Թուրքիայի ներկա ղեկավարները հիվանդագին են արձագանքում Հայոց ցեղասպանության հարցում համաշխարհային հանրության կողմից քննադատությունը, փորձում են ակտիվորեն հակազդել ցեղասպանության ճանաչման գործընթացին՝ քաղաքական ու տնտեսական լծակներ կիրառելով: Մասնավորապես, փորձագետի ներկայացմամբ, ապրիլի 6-ին Ղրիմի ինքնավար հանրապետության ղեկավարության հետ հանդիպման ժամանակ Թուրքիայի խորհրդարանի խոսնակ Ջեմիլ Չիչեքը փաստացի Ուկրաինայի եւ Թուրքիայի միջեւ ապրանքաշրջանառության ավելացման հարցը կապել է Ղրիմի թաթարների իրավունքների վերականգնման եւ Ղրիմի խորհրդարանի կողմից 2005-ին ընդունված Հայոց ցեղասպանության ճանաչման որոշումը չեղյալ հայտարարելու հետ:

http://news.am/arm/news/148717.html