Ֆրանսիայի նախագահ Ֆրանսուա Օլանդը նախընտրական շրջանում Ցեղասպանության ժխտումը քրեականացնող նոր օրինագիծ ներկայացնելու խոստում էր տվել, սակայն այն չի կարողանում իրականացնել Սահմանադրական դատարանի որոշման պատճառով։
Թուրքական «Հուրրիյեթ» պարբերականը, վկայակոչելով սեփական աղբյուրները, նշում է, որ Օլանդը «միջին բանաձև» է գտել ՝ ԵՄ օրենսդրության միջոցով այն հարմարեցնելով Ֆրանսիայի օրենսդրությանը։
Ֆրանսիական օրենքում «Հայոց ցեղասպանություն» ձևակերպումը չի լինելու, սակայն դրա ժխտումը հանցագործություն է համարվելու։
Ֆրանսիայի Սահմանադրական խորհրդի կողմից Նիկոլա Սարկոզիի պաշտոնավարման տարիներին «Հայոց ցեղասպանությունը ժխտելու» համար պատիժ սահմանող օրինագիծը չեղյալ էր համարվել։ Նախագահ Ֆրանսուա Օլանդը նախընտրական շրջանում օրինագիծը վերանայելու խոստում էր տվել, սակայն դատարանի որոշման դեմ նոր բանաձև ստեղծել չէին կարողացել։ «Հուրրիյեթ»-ի աղբյուրների հավաստմամբ՝ այժմ լուծումը գտնվել է։
Նոր օրինագիծը հիմնվելու է ԵՄ-ի կողմից 2008թ. նոյեմբերի 28-ին ընդունված Շրջանակային բանաձևի վրա, որտեղ ասվում է, որ մարդկության դեմ կատարված հանցանքների ժխտողականությունը պատժվում է Եվրոպական Միության տարածքում։
Օրենքի ձևակերպումը հետևյալն է լինելու. «Ցեղասպանությունը ժխտող, վիրավորող, ատելություն և վրեժ սերմանող, կրոնը, ռասան, ազգությունը վիրավորող խոսքերի համար սահմանվելու է 1-3 տարվա ազատազրկում»։
Ցեղասպանության մասին տեսակետ հայտնելը կամ գիտական աշխատանքներ իրականացնելը չի պատժվելու, սակայն ատելություն և վիրավորանք պարունակող խոսքեր ասողը պատասխանատվության է ենթարկվելու։
Այսպիսով՝ Սահմանադրական խորհրդի հիմնական փաստարկը՝ «խոսքի ազատությունը», ապահովվելու է։
Նոր օրենքը վերջնական տեսքի է բերելու Արդարադատության նախարարությունը, և ամենաուշը աշնանն այն խորհրդարանի օրակարգ է բերվելու։
Leave a Reply