Վիլսոնի իրավարար վճիռը` որպես պետական խնդիրների լուծում. դասախոսություն ԵՊՀ-ում՝ Արա Պապյանի կողմից

Ապրիլի 8-ին ԵՊՀ Արևելագիտության ֆակուլտետի Երկանյանների անվան դահլիճում «Վուդրո Վիլսոնի իրավարար վճռի շնորհիվ Հայկական հարցի լուծումը» թեմայով դասախոսություն կարդաց հայտնի արևելագետ, «Մոդուս Վիվենդի» կենտրոնի ղեկավար, նախկինում Կանադայում ՀՀ արտակարգ և լիազոր դեսպան Արա Պապյանը։

Դասախոսությունը կազմակերպել էր Արևելագիտության ֆակուլտետի ՈւԳԸ-ն: Դասախոսությանը ներկա էին ոչ միայն ուսանողներ, այլ նաև հյուրեր և դասախոսներ:

Պապյանի մատուցմամբ հիմնական դասախոսությունից առաջ «Հայոց ցեղասպանության միջազգային ճանաչման գործընթացը վերջին տարիներին» թեմայով ելույթ ունեցավ երիտասարդ թուրքագետ, «Թուրքագիտական պորտալի» հիմնադիր Գևորգ Պետրոսյանը:

Պապյանն իր հետաքրքիր և հագեցած ելույթի ժամանակ ներկայացրեց ԱՄՆ նախագահ Վուդրո Վիլսոնի իրավարար վճռի շնորհիվ Հայաստանի Հանրապետությանը տրված իրավունքերն և ցույց տվեց դրանց վերականգման ու ճիշտ օգտագործման ճանապարհը:

Բանախոսը նախ մանրակրկիտ քննության ենթարկեց Ալեքսանդրապոլի, Մոսկվայի և Կարսի պայմանագրերն (ըստ Պապյանի` փաստաթղթերը) ու հիմնավորումներով ցույց տվեց դրանց անօրինական լինելը:

Միևնույն ժամանակ ներկայացվեց Սևրի պայմանագիրը, դրանից բխող Վուդրո Վիլսոնի իրավարար վճիռը, որով որոշվում էր Հայաստանի և Թուրքիայի միջև սահմանը:
Պապյանը կանգ առավ նաև Լոզանի պայմանագրի վրա` այն քննելով Սևրի պայմանագրի հետ ունեցած հարաբերությունների տեսանկյունից:

Բանախոսը հստակ քայլերով ցույց տվեց ուսանողներին, թե Հայաստանի Հանրապետությունը ինչպես կարող է օգտագործել Վիլսոնի իրավարար վճիռը` իր առջև ծառացած մի շարք կենսական խնդիրներ լուծելու համար:

Արևելագետը նաև նշեց, որ ներկայում շատ կարևոր է, որպեսզի հայ հասարակությունը հասկանա, որ Հայոց ցեղասպանության միջազգային ճանաչումից զատ, անչափ կարևոր և մեր պետության համար կենսական նշանակություն ունի պահանջատիրության հարցը:

Դասախոսությանը հետևեց երկարատև ու օգտակար հարց և պատասխանը: Անգամ դասախոսության ավարտի մասին հայտարարելուց հետո ուսանողներն ու հյուրերը շարունակում էին հարցեր ուղղել Պապյանին, ով պատրաստակամությամբ պատասխանում էր նրանց բոլորին:

Սա այն դեպքերից է, երբ հազար անգամ այս մասին լսելու կամ կարդալու փոխարեն ուղղակի պետք է մեկ անգամ ներկա լինել դասախոսությանը:

Իսկ ավարտի խոսքում միջոցառման կազմակերպիչներից, երիտասարդ թուրքագետ Մխիթար Հայրապետյանը նշեց, որ ուսանողներն իսկապես տպավորված էին բանախոսների ելույթներից և ուրախալի է, որ նրանց գոնե մի փոքր հատվածն իսկապես հետաքրքրված է գիտությամբ։

http://haynews.am/hy/1365428588