Թ. Բաբալըն. Հայոց ցեղասպանության հարցը դանդաղեցնում է թուրք-կանադական առևտրային հարաբերությունները

Կանադայում Թուրքիայի դեսպան Թունջայ Բաբալըն «The Canadian Press» պարբերականի հետ զրույցում հայտարարել է, որ Հայոց ցեղասպանության հարցը դանդաղեցնում է Թուրքիա-Կանադա առևտրային հարաբերությունները:

Բաբալըն հայտարարել է, որ Կանադայի վարչապետ Սթիվեն Հարպերի կառավարության որոշումը` Օսմանյան կայսրության կողմից հայերի ջարդերը որակել որպես ցեղասպանություն, կարող է խոչընդոտել պոտենցիալ, եկամտաբեր առևտրային հարաբերությունները:

«Թուրքիան ցանկանում է Կանադայից ժեստ տեսնել: Դա սովորական գործարք չի կարող լինել` մեղադրել ժողովրդին ցեղասպանության մեջ: Դա լուրջ հայտարարություն է: Այն պետք է օրինական և պատմականորեն հիմնավորված լինի»,-նշել է դեսպանը:

Նշենք, որ 2004թ. Կանադայի խորհրդարանը 153 կողմ և 68 դեմ հարաբերակցությամբ ճանաչել է 1915 թ. հայերի ցեղասպանությունը: Օտտավայում Թուրքիայի դեսպանատունն արձագանքել է տեղի ունեցածին` ասելով, որ Կանադայի և Թուրքիայի հարաբերությունները կտուժեն այս որոշման պատճառով:

http://www.panorama.am/am/politics/2013/04/08/canada-turkey/