ԱՄՆ Փաստադենա քաղաքի միջնակարգ դպրոցների ուսումնական ծրագրում կներառվի նաեւ Հայոց ցեղասպանության թեման: Այդ նպատակով Ցեղասպանությունների մասին ուսուցման նախագիծը (GenEd) պատմության ուսուցիչների սեմինար է անցկացրել, հաղորդում է «Asbarez»-ը:
Սեմինարը ղեկավարել է մասնագետ Սառա Կոենը: Այն ընդգրկել է Հայոց ցեղասպանության հետ կապված հարցերի լայն շրջանակ` տերմինի նշանակությունն ու ծագումը, պայմանները, որոնք հանգեցնում են ցեղասպանության եւ այլն:
Ուսուցիչներին ներկայացվել են տարբեր ռեսուրսներ, որոնք նրանք կարող են օգտագործել դասընթացի ժամանակ: Հրավիրված մասնագետ Լորնա Տուրյան Միլերը պատմել է իր ծավալուն աշխատանքի մասին` հայերի եւ Ռուանդայում տեղի ունեցած ցեղասպանությունները վերապրածների պատմությունների հիման վրա:
Մասնակից ուսուցիչներից Ջո Շեյդին էլ ասել է, որ նախատեսում է սեմինարների ռեսուրսներն օգտագործել իր դասընթացի ժամանակ: «Ցանկանում եմ ցեղասպանության ութ փուլերը ներառել, որպեսզի աշակերտները կարողանան համեմատել ցեղասպանությունները ողջ պատմության ընթացքում եւ բոլոր տարածաշրջաններում»,-ասել է նա:
Leave a Reply