Քրդերի առաջնորդ Աբդուլլահ Օջալանը, դիմելով հայ և ասորի համայնքներին, ասել է, որ նրանց դեմ ցանկացած դիրքորոշում, նրանց իրավունքներն ու ազատությունները սահմանափակող, այդ իրավունքները «ձեռքներից խլող» ցանկացած քայլ անընդունելի է, և որ առանց նրանց` ժողովրդավարություն չի լինի։
Ինչպես տեղեկացնում է «Ակօս»-ը, թուրքական Իմրալը կղզում բանտարկված Օջալանի խոսքերը փոխանցել է Քրդական Խաղաղություն և ժողովրդավարություն կուսակցության համանախագահ Սելահեթթին Դեմիրթաշը, ով չորեքշաբթի հանդիպել էր Օջալանի հետ։
Քրդերի առաջնորդը կոչ է արել չխաբվել էժանագին քարոզչությանը և նշել, որ ինքն ինչպես որ մինչ այժմ է պայքարել հանուն արդարության, սրանից հետո էլ նույն կերպ է պայքարելու, և այս հաշտության գործընթացին վստահել է պետք։
Երեկ Օջալանը դարձյալ նամակ էր գրել և շնորհակալություն հայտնել իր ծննդյան օրը նշելու համար ծննդավայր գնացած քրդերին։
«Ես շատ լավ եմ, և մինչև վերջին շունչս լավ եմ լինելու։ Ամարա (Օջալանի ծննդավայրը) գալով իմ տարեդարձը շնորհավորողներին եմ շնորհակալ։ Այսօրվա իմ ասելիքն այն է, որ այժմ պատվաբեր խաղաղության համար հնարավորություններ ունենք։ Ես արդեն 65 տարեկան եմ դառնում։ Ես իմ հասանելիքն արեցի։ «Հպարտ եմ» ասող բոլորին՝ հարուստ թե աղքատ, կին թե տղամարդ, ծեր թե երիտասարդ, կոչ եմ անում հետևել այս փուլին։ Հուսով եմ, որ այլևս մի կաթիլ արյուն չի թափվի»,-գրել է Օջալանը։
Հիշեցնենք, որ Օջալանը մարտին Քրդական աշխատավորական կուսակցության (PKK) զինյալներին կոչ էր արել թողնել զենքերն ու լքել երկիրը։
Leave a Reply