Հռոմի նորընտիր Ֆրանցիսկոս պապը 2005թ. Բուենոս Այրեսում Հայոց ցեղասպանության 90 ամյակին` զոհերի հիշատակին նվիրված խաչքարի տեղադրման ժամանակ ասել է, որ փափագում է թաղվել այդ հուշարձանի տակ: Այս մասին գրել է Հայ առաքելական եկեղեցու Արգենտինայի և Չիլիի թեմի առաջնորդ Գիսակ արքեպիսկոպոս Մուրադյանը` «Մեր բարեկամ պապը» խորագրով հոդվածում բացահայտելով արգենտինացի Խորխե Մարիո Բերգոլիոյի ելույթի մանրամասները: «Հռոմեական Կաթողիկ» եկեղեցու նորընտիր Սրբազան պապը մեր բարեկամն է` անձնապես իմ, Բուենոս Այրեսի հայ համայնքի և ընդհանրապես` հայ ժողովուրդի: Իմ ծանոթությունը նորընտիր պապի հետ, սկսվել է 2005 թվականից, երբ Հայոց ցեղասպանության 90-ամյակն էր, և այդ առիթով Բուենոս Այրեսի Մայր տաճարի մեջ զետեղեցինք Հայաստանից բերված մի խաչքար` մեր նահատակների հիշատակին: Խաչքարի բացման ու օծման արարողությանը մասնակցեց նաև այդ օրերին Արգենտինայի արքեպիկոպոս և Բուենոս Այրեսի առաջնորդ կարդինալը՝ գերապատիվ Տեր Խորխե Մարիո Բերգոլիոն, ով, ի միջի այլոց, Հայաստանյայց առաքելական եկեղեցու և հայ ժողովրդի նահատակության մասին խոսելուց բացի, կոչ արեց Թուրքիային ընդունել Ցեղասպանության իրողությունը և խաղաղ լուծում փնտրել Հայկական հարցին: Նա շեշտեց նաև Հայ եկեղեցու Առաքելականությունը` Թադեոս և Բարդուղիմեոս առաքյալների շնորհիվ, իսկ խաչքարի բացումից հետո ասաց նաև, որ փափագում է մի օր թաղվել այդ խաչքարի տակ: Տեղին է հիշեցնել, որ Մայր տաճարի ներսում թաղված են Բուենոս Այրեսի նախկին առաջնորդները:
Ֆրանցիսկոս պապը միշտ էլ մասնակցել է ու ելույթ է ունեցել ապրիլյան նահատակներին նվիրված Մայր տաճարի մեր հոգեհանգստյան արարողություններին և այժմ վստահ եմ` որպես Հռոմի ու Կաթողիկե աշխարհի վեհապետ պապ` պետք է շարունակի մտածել ու գործել չքավորների և տառապյալների համար ու պաշտպան կմնա անարդարության զոհ դարձած բոլոր ազգերին, որոնց թվում նաև` հայ ժողովրդին ու հայոց դատին: Հաջողություն ու երկար կյանք ենք մաղթում մեր բարեկամ կարդինալ Խորխե Մարիո Բերգոլիոյին և մանավանդ Հռոմի այժմյան Ֆրանցիսկոս պապին»,- գրել է Արգենտինայի և Չիլիի առաջնորդ Գիսակ արքեպիսկոպոս Մուրադյանը:
Leave a Reply