Հրկիզվել է պոլսահայի առանձնատունը

Պոլսահայ համայնքն անհանգստացած է դարձյալ ու մտահոգ. մարտի 30-ին Ստամբուլի մոտ գտնվող ամառանոցային Քընալը կղզում ինքնությունն առայժմ անհայտ մարդիկ հրկիզել են Վրեժ Իսրայելյանի չորսհարկանի առանձնատունը: Անծանոթները նավթ են լցրել առանձնատան առաջին հարկի կահույքի վրա, հրդեհել ողջ հարկաբաժինը, «Ազգին» Գերմանիայից հաղորդում է Սարգիս Ադամը: Ստուգվել է, որ չարագործները գողության նպատակ չեն ունեցել, քանի որ որեւէ բան չի գողացվել: Վրեժ Իսրայելյանը հայտարարել է, որ ինքը որեւէ թշնամի կամ հակառակորդ չունի:

Թղթակիցն ավելացնում է, թե նկատի ունենալով, որ Քընալը կղզին արդեն տասնամյակներ ի վեր ամառային շրջանում գերազանցապես հայաբնակ է դառնում, դեպքը խուճապ է առաջացրել պոլսահայության մեջ: Մարդկանց մտքում դեռ շատ թարմ են Սամաթյա թաղամասում հայազգի ծերունիների նկատմամբ կատարված հարձակումները:

http://azg.am/AM/2013040404